Azərbaycan elminin tanınmış nümayəndəsi, filologiya elmləri doktoru, professor Həsən İbrahim oğlu Mirzəyevin xatirəsi ehtiramla anılır.
“Tehsil365” xəbər verir ki, 1927-ci il noyabrın 26-da Şərur-Dərələyəz qəzasının Qovuşuq kəndində dünyaya göz açan alim ömrünü Azərbaycan dilçiliyinin və türkoloji araşdırmaların inkişafına həsr edib. Uzun illər elmi-pedaqoji fəaliyyət göstərən Həsən Mirzəyev Azərbaycan dilinin tarixi, dialektologiyası və türkologiya sahəsində mühüm tədqiqatların müəllifi kimi tanınıb.
O, elmi fəaliyyətinə görə “Əməkdar Elm Xadimi” fəxri adına layiq görülüb, professor kimi çoxsaylı kadrların hazırlanmasında xüsusi rol oynayıb. 2008–2015-ci illərdə Azərbaycan Aşıqlar Birliyinin üzvü olub, milli-mədəni irsin qorunması və təbliği istiqamətində də fəal iştirak edib.
Həsən Mirzəyev 2015-ci il fevralın 25-də Bakı şəhərində vəfat edib. Onun zəngin elmi irsi və Azərbaycan dilçiliyinə verdiyi töhfələr bu gün də dəyərli mənbə kimi əhəmiyyətini qoruyur.