“Xarici dil tədrisində əsas problemlərdən biri şagirdlərin dili real ünsiyyət vasitəsi kimi deyil, daha çox qrammatika və test fənni kimi mənimsəməsidir.”
Bu fikirləri, Tehsil365"ə müsahibəsində ingilis dili müəllimi, pedaqoq Lamiyə Quliyeva bildirib.
Şagirdlərin ingilis dili öyrənməsində əsas çətinlik nədir?
— Əsas çətinlik dili real ünsiyyət vasitəsi kimi deyil, yalnız qrammatika qaydaları və test predmeti kimi görmələridir. Bu zaman şagird qaydanı bilir, amma danışmaqda çətinlik çəkir.
Dərs proqramı bu çətinlikdə nə qədər rol oynayır?
— Dərs proqramı müəyyən qədər rol oynayır. Əgər proqram daha çox yazılı tapşırıqlara və qaydalara yönəlibsə, praktik danışıq və dinləmə bacarıqları kölgədə qala bilir. Bu da dili tətbiq etməyi çətinləşdirir.
Müəllimlərin tətbiq etdiyi metodlar şagirdlər üçün yetərlidirmi?
— Metodlar effektiv ola bilər, lakin interaktivlik az olduqda nəticə zəifləyir. Şagird aktiv iştirak etmirsə, yalnız dinləyici mövqedə qalır və dil bacarığı tam formalaşmır.
Ən çox zəiflik olan bacarıq sahəsi hansıdır?
— Adətən danışıq və dinləmə bacarıqları daha zəif olur. Çünki bu sahələr daha çox praktika və real mühit tələb edir.
Bu problemləri aradan qaldırmaq üçün hansı qısa və praktik tövsiyələri verərdiniz?
— Dərslərdə daha çox danışıq fəaliyyəti təşkil etmək, qrup işləri və debatlar keçirmək, gündəlik qısa dinləmə məşqləri etmək və dili real situasiyalarda tətbiq etməyə şərait yaratmaq effektiv nəticə verə bilər.