Fevralın 26-da “İRƏLİ” İctimai Birliyi və Beynəlxalq Muğam Mərkəzinin birgə təşkilatçılığı, Azərbaycan Respublikası Gənclər və İdman Nazirliyinin tərəfdaşlığı ilə Xocalı soyqırımının 34-cü ildönümünə həsr olunmuş “Xocalıya ədalət” adlı anım tədbiri keçirilib.
“Tehsil365” AZƏRTAC-a istinadla xəbər verir ki, tədbirdə Bakı Musiqi Akademiyasının tələbələrindən ibarət “SABAH” xor kollektivi dirijor Dmitriy Babayevin müşayiəti ilə Azərbaycanın Dövlət Himnini və “Şəbi-hicran” əsərini ifa edib.
Proqram çərçivəsində Azərbaycanın görkəmli şairlərinin şeirləri, eləcə də Azərbaycan bəstəkarlarının Xocalı motivləri əsasında qələmə aldıqları musiqi nömrələri səsləndirilib.
Qeyd edək ki, “İRƏLİ” İctimai Birliyi gənclərin vətənpərvər ruhda tərbiyə olunması istiqamətində mütəmadi olaraq oxşar layihə və tədbirlər həyata keçirir. Bu cür təşəbbüslərin əsas məqsədi gənclər arasında milli-mənəvi dəyərlərin təbliği, tarixi yaddaşın qorunması, vətənə bağlılıq hissinin gücləndirilməsi və şəhidlərin əziz xatirəsinin gələcək nəsillərə aşılanmasıdır.