“Samsung” Galaxy Buds 4 və Buds 4 Pro qulaqlıqlarını təqdim edib. “Gizmodo” yazır ki, “Samsung” cihazların dizaynını yeniləyərək metal element əlavə edib. Şarj qutusu da dəyişdirilib və Galaxy Buds 2 modelinin qutusuna bənzədilib.
“Tehsil365“ Banker.az-a istinadən xəbər verir ki,“The Verge”in məlumatına görə, Galaxy cihazlarının istifadəçiləri üçün funksiyalar paketinə sürətli qoşulma, əllərdən istifadə etmədən “Bixby” və ya “Google” köməkçisini çağırmaq, baş hərəkətləri ilə idarəetmə və 22 dili dəstəkləyən real vaxt rejimində tərcümə daxildir.
Galaxy Buds 4 modelində batareyanın tutumu qulaqlıqlarda 45 mA·s, şarj qutusunda isə 515 mA·s təşkil edir. Aktiv səsboğma (ANC) funksiyası ilə musiqi dinləmə müddəti 5 saata qədər, qutudan enerji yığmaqla ümumi iş vaxtı isə 24 saata qədərdir.
Galaxy Buds 4 Pro modelində isə batareya tutumu müvafiq olaraq 61 mA·s və 530 mA·s təşkil edir. Aktiv səsboğma ilə dinləmə müddəti 6 saata qədər, qutu ilə birlikdə isə 26 saata qədərdir.
Hər iki model Android 12 və ya daha yeni versiyalarla uyğundur. Qulaqlıqlarda sümük keçiriciliyi sensorları, təzyiq və toxunma sensorları quraşdırılıb. Onlar təkmilləşdirilmiş aktiv səsboğma, adaptiv ekvalayzer və “ətraf səs” (ambient sound) rejimini dəstəkləyir.
Galaxy Buds 4 açıq tipli (earbuds) formadadır, Pro versiyası isə qulaq daxilinə yerləşdirilən modeldir. Böyük model iki zolaqlı akustik sistem və böyüdülmüş dinamiklərlə təchiz olunub. Qulaqlıqlar 24-bit/96 kHz Hi-Fi audio səsləndirməni dəstəkləyir. Dəstəklənən audio kodeklər: SSC, SSC UHQ, AAC, SBC və LC3.
“The Verge”in məlumatına görə, Galaxy Buds 4 modelinin qiyməti 179 dollar, Buds 4 Pro modelinin qiyməti isə 249 dollardır.