Məktəbəqədər təhsil son illərdə daha çox müzakirə olunan mövzulardandır. Bir çox valideynləri düşündürən əsas sual isə budur: bağçaya gedən uşaqla getməyən uşaq arasında real fərq varmı?
Mövzu ilə bağlı məktəbəqədər təhsil eksperti Töhfə Mustafayeva “Tehsil365"ə açıqlama verib.
Ekspert bildirib ki, “Məktəbəqədər təhsil uşağın yalnız akademik deyil, sosial və emosional inkişafında da mühüm rol oynayır. Bu mərhələ uşağın məktəbə adaptasiyasını asanlaşdırır.”
Onun sözlərinə görə, bağçaya gedən uşaqlarda müəyyən bacarıqlar daha erkən formalaşır: “Belə uşaqlar kollektivdə davranış qaydalarına uyğunlaşma, növbə gözləmə, paylaşma və ünsiyyət qurma kimi sosial bacarıqlarda daha təcrübəli olurlar.”
Ekspert vurğulayıb ki, fərq xüsusilə birinci sinif mərhələsində daha aydın hiss edilir: “Məktəb mühitinə uyğunlaşma, müəllim təlimatlarını dinləmə və tapşırıqları yerinə yetirmə bacarığı bağça təcrübəsi olan uşaqlarda adətən daha rahat müşahidə olunur.”
Bununla belə, mütəxəssis qeyd edib ki, hər şey yalnız bağçadan asılı deyil: “Əgər valideyn evdə uşağın inkişafı ilə sistemli şəkildə məşğul olursa, sosial mühit yaradırsa və müstəqillik bacarıqlarını dəstəkləyirsə, fərq minimuma enə bilər.”
Sonda ekspert əlavə edib ki, əsas məsələ erkən yaşda düzgün inkişaf mühitinin yaradılmasıdır: “Uşaq bağçada və ya evdə – harada olursa olsun, onun emosional təhlükəsizliyi və inkişafına diqqət əsas şərtdir.”