Moldova Respublikasının Qaqauziya Muxtar Ərazi Qurumunun (Qaqauz Yeri) Avdarma kəndinin Tarixi Muzeyində Xocalı soyqırımının 34-cü ildönümü münasibətilə anım tədbiri keçirilib.
“Tehsil365” xəbər verir ki, Azərbaycanın Moldovadakı səfirliyinin təşkilatçılığı ilə keçirilən anım tədbirində Qaqauz Yerinin paytaxtı Komrat şəhər meri Sergey Anastasov, Çadır-Lunqa və Vulkaneşt şəhərlərinin rəhbərləri, Komrat Dövlət Universitetinin müəllim və tələbə heyəti, burada təhsil alan azərbaycanlı tələbələr, Türkiyə, Qazaxıstan və Ukraynanın səfir və diplomatları iştirak ediblər.
Anım tədbiri Xocalı soyqırımı qurbanlarının əziz xatirəsini bir dəqiqəlik sükutla başlayıb. Sonra çıxış edən Azərbaycanın Moldovadakı səfiri Ülvi Baxşəliyev iştirakçılara Xocalı soyqırımı barədə ətraflı məlumat verib. Qeyd edib ki, Xocalı soyqırımı Azərbaycan xalqının XX əsrdə üzləşdiyi ən dəhşətli faciələrdən biridir.
Səfir Ümummilli Lider Heydər Əliyevin təşəbbüsü ilə ilk olaraq bu faciəyə siyasi qiymət verildiyini və 26 fevralın Xocalı Soyqırımı Günü kimi elan edildiyini bildirib. Həmçinin Xocalı faciəsi ilə bağlı həqiqətlərin dünya ictimaiyyətinə çatdırılmasında Leyla Əliyevanın 2008-ci ildən başladığı “Xocalıya ədalət!” təbliğat-informasiya kampaniyasının rolunu vurğulayıb.
Ü.Baxşəliyev fevralın 26-da Azərbaycan Prezidenti İlham Əliyev, birinci xanım Mehriban Əliyeva və ailə üzvlərinin Xocalı şəhərində Xocalı Soyqırımı Memorialının açılışında iştirak etdiyini də qeyd edib.
Sonra Xocalı hadisələri ərəfəsində Bakıda ali təhsilini davam etdirmiş muzeyin təsisçisi İqnat Kazmalı çıxış edərək bildirib ki, 20 Yanvar hadisəsi və Xocalı soyqırımı zamanı Azərbaycan xalqının dərdini, faciəsinin şahidi olub.
Daha sonra iştirakçılar Xocalı soyqırımına dair fotosərgi ilə tanış olublar.
Anım tədbiri çərçivəsində, həmçinin muzeyin yaxınlığında yerləşən 1946-1947-ci illərdə Qaqauziyada Qolodomor qurbanlarının xatirəsinə ucaldılan abidə önünə tər çiçəklər də qoyulub.