Alimlərin araşdırmalarına görə, insan beyni yuxu zamanı fəaliyyətini dayandırmır, əksinə gün ərzində öyrənilən məlumatları emal edərək yaddaşı möhkəmləndirir. Mütəxəssislər bildirirlər ki, xüsusilə dərin yuxu mərhələsində beyin yeni məlumatları təkrar “aktivləşdirir” və onları uzunmüddətli yaddaşa köçürür.
“Tehsil365” in araşdırmalarına əsasən, kifayət qədər yatmayan insanlarda diqqət və yaddaş problemləri daha çox müşahidə olunur. Bu səbəbdən imtahan və ya vacib tapşırıqlardan əvvəl yuxusuz qalmaq öyrənilən məlumatların yadda saxlanmasını çətinləşdirə bilər.
Mütəxəssislərin fikrincə, yuxu yalnız istirahət üçün deyil, həm də beynin məlumatları sistemləşdirməsi üçün vacib prosesdir. Bu barədə aparılan tədqiqatlar göstərir ki, normal yuxu rejimi öyrənmə qabiliyyətini və zehni fəaliyyəti əhəmiyyətli dərəcədə artırır.
Harvard Medical School mütəxəssisləri də qeyd edir ki, yuxu yaddaşın formalaşmasında əsas rol oynayır və xüsusilə tələbələr üçün gündəlik kifayət qədər yatmaq vacib hesab olunur.