Universitet illəri gənclərin həyatında dönüş nöqtəsi hesab olunur. Bu dövr yalnız diplom almaq deyil, həm də şəxsiyyətin formalaşması mərhələsidir.
Mövzu ilə bağlı Aysu Cəfərzadə “Tehsil365"ə danışıb.
“Təhsil aldığım illər ərzində ən böyük qazancım yalnız ixtisas bilikləri olmadı. Mən düşünməyi, araşdırma aparmağı və sual verməyi öyrəndim.”
Tələbənin sözlərinə görə, universitet mühiti ona müstəqillik qazandırıb: “Artıq qərarları özüm verməyi, məsuliyyət daşımağı və vaxtımı düzgün planlaşdırmağı bacarıram. Bu, dərslər qədər önəmli təcrübədir.”
O bildirib ki, sosial mühit də böyük rol oynayıb: “Fərqli dünyagörüşünə malik insanlarla tanış oldum. Komanda işində çalışmağı, fikrimi müdafiə etməyi və eyni zamanda başqalarını dinləməyi öyrəndim.”
Tələbə qeyd edib ki, çətinliklər də inkişafın bir hissəsi olub: “Bəzən uğursuzluqlar yaşadım, amma məhz həmin anlar məni daha güclü və səbirli etdi.”
Onun fikrincə, təhsil yalnız nəzəri bilik deyil: “Universitet mənə öz potensialımı kəşf etməyi və gələcək hədəflərimi daha dəqiq müəyyənləşdirməyi öyrətdi.”