Azərbaycan Dillər Universitetinin Beynəlxalq münasibətlər və regionşünaslıq fakültəsinin Qərb ölkələri üzrə Regionşünaslıq kafedrasının təşkilatçılığı ilə “Azərbaycanda şəhərsalma və memarlıq ili” çərçivəsində “Bakının su təminatının tarixi mərhələləri” mövzusunda dəyirmi masa keçirilib.
“Tehsil365” xəbər verir ki, tədbirin əsas məqsədi iqlim dəyişiklikləri probleminin aktuallıq kəsb etdiyi bir dövrdə Bakının su problemlərinə diqqət çəkmək, eləcə də bu mühüm məsələnin elmi-praktik aspektlərini işıqlandırmaq olub. Professor-müəllim heyəti və tələbələrin iştirak etdiyi tədbirdə paytaxtın su təminatı sisteminin formalaşması və inkişaf mərhələləri tarixi baxımdan təhlil edilib, müxtəlif dövrlərdə tətbiq olunan mühəndis həlləri və infrastruktur layihələri ətrafında geniş müzakirələr aparılıb.
Kafedranın baş müəllimi Xəyalə Ağayeva çıxışında Bakının su təchizatında ovdanların rolundan bəhs edərək bildirib ki, Abşeron yarımadasının quraq iqlim şəraitində ovdanlar əsrlər boyu əhalinin əsas su mənbələrindən biri olub və şəhərin sosial-iqtisadi həyatında mühüm yer tutub. O, ovdanların tarixi memarlıq nümunəsi kimi həm mühəndislik, həm də mədəni irs baxımından əhəmiyyətini xüsusi vurğulayıb.
Baş müəllim Mehpare Tajdehibonab isə çıxışında Şollar su kəmərinin Bakının su təchizatındakı roluna diqqət çəkib. Qeyd olunub ki, XX əsrin əvvəllərində inşa edilən bu mühüm infrastruktur layihəsi paytaxtın keyfiyyətli içməli su ilə təminatında dönüş nöqtəsi olub və şəhərin sürətli inkişafına təkan verib.
Qərb ölkələri üzrə Regionşünaslıq kafedrasının müdiri, professor Sevdagül Əliyeva isə Ceyranbatan su anbarının Bakının su ilə təmin olunmasındakı strateji əhəmiyyətindən danışıb. Bildirilib ki, müasir dövrdə su anbarı paytaxtın dayanıqlı su təminatı sisteminin əsas komponentlərindən biri kimi çıxış edir və artan əhali tələbatının qarşılanmasında mühüm rol oynayır.
Tədbirin sonunda fakültənin dekanı, tarix elmləri doktoru, professor İbrahim Kazımbəyli suyun həyat üçün əvəzsiz əhəmiyyətini vurğulayıb, su ehtiyatlarının qorunması və səmərəli istifadəsinin vacibliyi ilə bağlı tələbələrə çağırış edib. Qeyd olunub ki, suya məsuliyyətli yanaşma həm ekoloji tarazlığın qorunması, həm də gələcək nəsillərin rifahı baxımından strateji əhəmiyyət daşıyır.
