Azərbaycan Dövlət Akademik Musiqili Teatrında “İnanıram” mono-tamaşasının növbəti nümayişi keçirilib. Tamaşa rejissor Leonid Klyots tərəfindən Ülviyyə Heydərovanın eyniadlı əsəri əsasında səhnələşdirilib və şəhidlərin, eləcə də onların analarının xatirəsinə həsr olunub.
“Tehsil365” AZƏRTAC-a istinadla xəbər verir ki, müxbir ilə söhbətində L.Klyots belə tamaşaların cəmiyyət üçün əhəmiyyətindən danışıb.
“Belə səhnə əsərləri insanlarda canlı emosiyalar oyadır. Fikrimcə, teatrın məqsədi də məhz gündəlik həyatda üzə çıxmayan və ya insanın daxilində, şüuraltında qalan hissləri üzə çıxarmaqdır. İnsan olaraq qalmaq üçün bu emosiyaları yaşamaq lazımdır. Bu, həm başqasının dərdinə şərik olmaq, həm də empatiya duymaqdır.
Biz “İnanıram” tamaşasını Xocalı soyqırımı qurbanlarının anım günündə təsadüfən nümayiş etdirmirik. Belə faciələri xatırlamaq, həlak olanların xatirəsini yad etmək vacibdir. Ən başlıcası isə belə hadisələrin bir daha təkrarlanmamasına nail olmaqdır”, – deyə müsahibimiz vurğulayıb.
Rejissor başqa mədəniyyətin nümayəndəsi kimi bu material üzərində necə işlədiyindən danışarkən qeyd edib ki, mədəniyyətlər fərqli ola bilər, lakin hər birində ümumbəşəri prinsiplər və dəyərlər mövcuddur: “Yaradıcı insan kimi, mən təsəvvür və empatiya hissindən məhrum olmayan biri olaraq müharibədə övladını itirmiş ananın rolunu çox yaxşı anlayıram. Çünki ana dərdi sərhəd tanımır. Mən Ukraynadanam. Doğma ölkəmdə baş verənlər Azərbaycanın yaşadıqları ilə çox səsləşir. Burada “sənin dərdin” və “mənim dərdim” bölgüsü ola bilməz. Bu, böyük faciədir – anaların faciəsi, uşaqların faciəsi, bütöv xalqların faciəsi”.
“Tamaşanın sonunda müxtəlif dillərdə “İnanıram” sözünün səslənməsi təsadüfi deyil. Ürəkdən inanıram, elə bir vaxt gələcək ki, bu faciələr kitablarda uzaq keçmiş kimi yazılacaq və bir daha təkrarlanmayacaq hadisələr kimi xatırlanacaq. Həyatda isə uşaqlar yaşlı valideynlərini son mənzilə yola salacaqlar, əksi olmayacaq. Sözsüz ki, mən buna inanıram. Yaradıcılığımın məqsədi cəmiyyətə bir zərrə də olsa xeyirxahlıq və insani anlayış gətirməkdir”, – deyə L.Klyots əlavə edib.