Sumqayıt şəhər 8 nömrəli tam orta məktəbə yeni direktor təyin olunub.
“Tehsil365” xəbər verir ki, bu vəzifəyə Mehdiyeva Zəminə Bəhmən qızı təyin edilib.
Zaminə Mehdiyeva ixtisasca biologiya müəllimidir və pedaqoji fəaliyyətinə 2015-ci ildən başlayıb.
Qeyd edək ki, Zəminə Mehdiyevanın babası, Qubadlı rayonu Novlu kənd sovetinin sədri Mehdiyev Mehdi Qasım oğlu 1989-cu ildə ermənilər tərəfindən əsir götürülərək 4 aydan sonra vəhşicəsinə qətlə yetirilib və Qubadlının ilk şəhidlərindən biri olub.
Atası, tarix müəllimi Mehdiyev Bəhmən Mehdi oğlu atasının ölümündən sonra polis sıralarına qoşulub, könüllü olaraq torpaqlarımızın müdafiəsində iştirak edərək döş nişanı və medallarla təltif edilib. O, 26 oktyabr 1992-ci ildə Basarat kəndinin Topağac yüksəkliyi uğrunda gedən döyüşdə qəhrəmancasına şəhid olub və ölümündən sonra “Vətən uğrunda” medalına layiq görülüb.
Zəminə Mehdiyevanın qardaşı, hüquqşünas Mehdiyev Zamin Bəhmən oğlu Vətən müharibəsində yaralanıb, “Cəbrayılın azad olunmasına görə”, “Vətən müharibəsi iştirakçısı” və “Vətən uğrunda” medalları ilə təltif edilib.
Abşeron-Xızı regional təhsil idarəsindən “Qafqazinfo”ya bildirilib ki, direktorların İşə Qəbulu imtahanında uğur qazanaraq fəaliyyətə başlayan Zəminə Mehdiyeva ixtisasca biologiya müəllimidir və pedaqoji yoluna 2015-ci ildə MİQ imtahanı ilə başlayıb, 2022-ci il MİQ imtahanında 85 bal, 2025-ci il sertifikasiya imtahanında isə 56 bal toplayaraq yüksək peşəkarlıq nümayiş etdirib.