Bu gün rəqəmsal texnologiyaların tətbiqi yalnız texnoloji yeniliklərdən ibarət deyil, həm də dövlət idarəetməsinin səmərəliliyini artıran, şəffaflığı gücləndirən və vətəndaşların rifahını yüksəldən strateji hədəfli bir prosesdir.
“Tehsil365“ AZƏRTAC-a istinadən xəbər verir ki, bunu açıqlamasında politoloq, Mətbuat Şurasının İdarə Heyətinin üzvü Yeganə Hacıyeva deyib.
O qeyd edib ki, rəqəmsal transformasiya yalnız texnologiyanın tətbiqi ilə məhdudlaşmır, həm də bütün dünyada təşkilati mədəniyyətin, idarəetmə metodlarının və koordinasiya mexanizmlərinin dərindən dəyişməsinə səbəb olur.
“Aparıcı ölkələrin təcrübəsi onu göstərir ki, rəqəmsal transformasiyanın uğurunu təmin edən əsas institusional mexanizm mərkəzi koordinasiya strukturu ilə idarə olunmasıdır. Belə orqanlar dövlət strategiyası ilə sinxronlaşdırılmış layihələr həyata keçirir ki, bu da rəqəmsal xidmətlərin qarşılıqlı inteqrasiyasını təmin etməklə nəticədə dövlət resurslarının effektiv istifadəsinə səbəb olur”, - deyə politoloq bildirib.
Onun sözlərinə görə, Azərbaycanda rəqəmsallaşma, elektron hökumət, süni intellekt və innovasiya sahələrində fəaliyyətin təkmilləşdirilməsi məqsədi ilə yardılmış Rəqəmsal İnkişaf Şurası bu sahədə əsas institusional koordinasiya mərkəzi kimi nəzərdə tutulur. Bütün dünyada olduğu kimi, Azərbaycan da rəqəmsal transformasiya üçün milli səviyyədə vahid koordinasiya strukturu yaratmaqla rəqəmsal strategiyaların icrasında səmərəliliyi artırmağı hədəfləyib.
Ekspert qeyd edib ki, fəaliyyət planı ilə bağlı sənədin təhlili Rəqəmsal İnkişaf Şurasının əsas fəaliyyət istiqamətlərindən birinin rəqəmsal transformasiyanın milli strateji planlaşdırma olacağını göstərir. Şuranın kordinasiya etdiyi milli rəqəmsal inkişaf konsepsiyası, süni intellekt strategiyası Azərbaycan dövlətini yeni idarəetmə səviyyəsini keçirəcək. Çünki süni intellekt və məlumatların idarə edilməsi siyasətinin prioritet istiqamət kimi müəyyən edilməsi rəqəmsal iqtisadiyyatın və rəqəmsal dövlət xidmətlərinin inkişafında mühüm rol oynayacaq. Süni intellekt texnologiyaları yalnız dövlət xidmətlərinin avtomatlaşdırılmasını təmin etmir, həm də proqnozlaşdırma, informasiya aktivlərinin optimallaşdırılması və idarəetmənin səmərəli həyata keçirilməsinə imkan yaradır.
Amma burda əsas hədəf, milli hədəflərin proseslərin nüvəsinə yerləşdirilməsinə nail olmaqdır. Təcrübə göstərir ki, bu istiqamətlərin prioritetləşdirilməsi dövlət xidmətlərinin keyfiyyətini yüksəldir və vətəndaşlar üçün daha əlçatan edir.
“Rəqəmsal İnkişaf Şurası koordinasiya mexanizmləri dövlət büdcəsi və insan resurslarının optimal bölüşdürülməsini təmin edəcək, artıq təkrarlanan layihələrin qarşısını almaqla resursların səmərəli istifadəsinə şərait yaradacaq. Rəqəmsal xidmətlərin inteqrasiyası və idarə olunması dövlət xidmətlərinin şəffaf, əlçatan və nəticəyönümlü etməklə səmərəliliyi artıracaq. Belə institusional model, dövlət idarəçiliyində strateji, təşkilati və icraya nəzarət funksiyalarını birləşdirən əsas platforma olacaq.
Azərbaycan üçün bu yanaşma dövlət idarəçiliyinin müasir çağırışlara uyğunlaşmasına, rəqabət qabiliyyətinin yüksəlməsinə və rəqəmsal transformasiyanın məqsədyönlü şəkildə reallaşdırılmasına güclü hüquqi və institusional zəmin yaradır”, - deyə Yeganə Hacıyeva əlavə edib.