Balakən Gənclər evində "Dayanıqlı və sabit gələcək naminə ekoloji risklərin idarə edilməsi” mövzusunda maarifləndirici təlim keçirilib.
“Tehsil365" AZƏRTAC istinadən xəbər verir ki, bu barədə AZƏRTAC-ın bölgə müxbirinə Balakən Gənclər evindən məlumat verilib.
Bildirilib ki, təlim 1 Mart - Ümumdünya Mülkü Müdafiə Günü münasibətilə Şəki-Zaqatala Regional Gənclər və İdman İdarəsinin Balakən rayonu üzrə gənclər və idman sektoru və “Gənclər evi” sosial xidmət müəssisəsinin birgə təşkilatçılığı ilə keçirilib. Təlim çərçivəsində iştirakçılar təbii və texnogen risklərin müəyyənləşdirilməsi, erkən xəbərdarlıq sistemləri, operativ qərarvermə və icma əsaslı hazırlıq planları müzakirə olunub. İştirakçılar qrup işləri vasitəsilə real situasiyalar üzərində çalışaraq, risklərin azaldılması və düzgün idarə olunması yollarını öyrəniblər.
Çıxışlarda diqqətə çatdırılıb ki, mülki müdafiə tədbirlərinin gücləndirilməsi, gənclərin bu sahədə maarifləndirilməsi və onların fövqəladə hallara hazırlıq səviyyəsinin artırılması mühüm əhəmiyyət daşıyır. Xüsusilə gənclərin ekoloji risklərin azaldılması istiqamətində fəal mövqe tutmasının vacibliyi diqqətə çatdırılıb.
Daha sonra Fövqəladə Hallar Nazirliyinin Dövlət Yanğından Mühafizə Xidmətinin Balakən rayon Dövlət Yanğından Mühafizə Hissəsinin nümayəndəsi çıxış edərək, ekoloji risklərin idarə olunması, fövqəladə hallarda düzgün davranış qaydaları, eləcə də ətraf mühitin qorunması istiqamətində həyata keçirilən tədbirlər barədə ətraflı məlumat verib.
Təlim interaktiv formada davam edib, iştirakçıları maraqlandıran suallar cavablandırılıb.