Azərbaycan muğam məktəbinin tanınmış simalarından biri olan Cahan Talışinskaya milli musiqi mədəniyyətinin inkişafında mühüm rol oynayıb.
“Tehsil365” xəbər verir ki, O, 9 fevral 1909-cu ildə Lənkəranda dünyaya gəlib.
Güclü səs tembri və muğamları dərin emosional çalarlarla ifa etmək bacarığı ilə seçilən sənətkar qısa müddətdə dinləyicilərin rəğbətini qazanıb. Cahan Talışinskaya müxtəlif muğam dəstgahlarını və xalq mahnılarını özünəməxsus üslubda təqdim edərək xanəndəlik sənətinə töhfələr verib.
Onun yaradıcılığı dövlət tərəfindən də yüksək qiymətləndirilib və 1940-cı ildə Azərbaycan SSR-in əməkdar artisti fəxri adına layiq görülüb. Bu ad sənətkarın milli musiqi sahəsindəki xidmətlərinin rəsmi təsdiqi idi.
Cahan Talışinskaya 1 mart 1967-ci ildə Bakıda vəfat edib. Onun zəngin yaradıcılığı Azərbaycan muğam sənətinin tarixi irsinin dəyərli səhifələrindən biri kimi bu gün də ehtiramla yad edilir.