Təhsil prosesində müəllim və şagird münasibətləri əsas amillərdən biri hesab olunur. Sağlam və qarşılıqlı hörmətə əsaslanan ünsiyyət həm akademik nəticələrə, həm də şagirdin psixoloji vəziyyətinə birbaşa təsir edir. Bəs bu münasibətlərdə ən çox hansı problemlər müşahidə olunur?
Mövzu ilə bağlı təhsil eksperti “Tehsil365"ə açıqlama verib.
Ekspert bildirib ki, əsas problemlərdən biri ünsiyyət çatışmazlığıdır: “Bəzi hallarda müəllim şagirdin fərdi xüsusiyyətlərini və emosional vəziyyətini nəzərə almır. Bu isə qarşılıqlı anlaşılmazlığa səbəb olur.”
Onun sözlərinə görə, həddindən artıq sərt yanaşma da münasibətləri zədələyə bilər: “Təzyiq və qorxu üzərində qurulan münasibət qısamüddətli intizam yarada bilər, lakin uzunmüddətli perspektivdə motivasiyanı azaldır.”
Ekspert qeyd edib ki, digər problem isə hörmət balansının pozulmasıdır: “Bəzən şagirdlər müəllimə qarşı qeyri-etik davranış sərgiləyir. Bunun arxasında ailə mühiti, sosial şəbəkələrin təsiri və ya ümumi intizam problemləri dayana bilər.”
Mütəxəssis vurğulayıb ki, müqayisə və etiketləmə də münasibətlərə mənfi təsir göstərir: “Şagirdi digərləri ilə müqayisə etmək və ya onu müəyyən xüsusiyyətlərlə damğalamaq özgüvənə ciddi zərbə vurur.”
Sonda ekspert bildirib ki, problemin həlli üçün açıq dialoq və empati əsasdır: “Müəllim həm pedaqoq, həm də psixoloji dəstək verən şəxs rolunu daşıyır. Qarşılıqlı hörmət və anlayış mühiti formalaşdırılarsa, bir çox problemlərin qarşısını almaq mümkündür.”