28 fevral tarixində “Tehsil365” İnformasiya Agentliyinin layihəsi olan “Şəhidin səsi” proqramının növbəti buraxılışı çəkilib. Budəfəki buraxılış şəhid polis əməkdaşı Seyfi Abdullayevin əziz xatirəsinə həsr olunub. Verilişin aparıcısı agentliyin “Könüllü müxbir” layihəsinin iştirakçısı Zeynəb Quluyevadır.
“Tehsil365” xəbər verir ki, Abdullayev Seyfi Fəqan oğlu 22 sentyabr 1994-cü ildə Bakı şəhərinin Sabunçu rayonunda anadan olub. Orta təhsilini Bakı şəhəri 148 saylı tam orta məktəbdə alıb. 2012-ci ildə məktəbi bitirib, 2013-cü ilin oktyabr ayında hərbi xidmətə yollanıb. O, Hacıqabulda və Naxçıvan Muxtar Respublikasında Daxili Qoşunların N saylı hərbi hissəsində xidmət edib və 2015-ci ilin aprel ayında həqiqi hərbi xidmətini başa vurub.
Müxtəlif sahələrdə çalışdıqdan sonra, 2019-cu ilin yanvar ayında Azərbaycan Respublikasının Daxili İşlər Nazirliyinin Əlahiddə Çevik Polis Alayının Xüsusi Təyinatlı Taborunda polis nəfəri kimi xidmətə başlayıb. Daha sonra polis serjantı rütbəsində fəaliyyətini davam etdirib.
Seyfi Abdullayev 19 sentyabr 2023-cü ildə Xocavənd rayonunun Tağaverd kəndi ərazisində keçirilən lokal antiterror tədbirləri zamanı erməni silahlı birləşmələrinin mina terroru nəticəsində şəhid olub. O, Şamaxı rayonunun Qəleybuğurd kənd qəbiristanlığında dəfn edilib.
Azərbaycan Respublikasının ərazi bütövlüyünün təmin olunmasında göstərdiyi yüksək peşəkarlıq, şücaət və mərdliyə görə Abdullayev Seyfi Fəqan oğlu Azərbaycan Respublikasının Prezidenti İlham Əliyevin sərəncamı ilə “Vətən uğrunda” medalı ilə təltif edilib.
Allah bütün şəhidlərimizə rəhmət eləsin.
