Şəki Şəhər İcra Hakimiyyətinin və Uşaq Səfirlər Məclisinin Şəki üzrə nümayəndəsi Cavidan Cabbarlının təşəbbüsü, Şəki şəhər 5 nömrəli tam orta ümumtəhsil məktəbinin təşkilatçılığı ilə məktəbdə “Milli-mənəvi dəyərlərimizdən gələcəyə baxış” adlı maarifləndirici tədbir keçirilib.
“Tehsil365" AZƏRTAC istinadən xəbər verir ki,şəhər İcra Hakimiyyətindən AZƏRTAC-ın bölgə müxbirinə bildirilib, tədbirin əsas məqsədi şagirdlərdə milli kimlik şüurunun möhkəmləndirilməsi, xalqımızın zəngin mənəvi irsinin təbliği və milli dəyərlərimizin gələcək nəsillərə ötürülməsi olub.
İcra hakimiyyətinin nümayəndəsi, Uşaq Hüquqlarının Müdafiəsi üzrə Komissiyanın məsul katibi Günəş Əzimova, rayon Ağsaqqallar Şurasının sədri Vaqif Əhmədov, Təhsil sektorunun nümayəndəsi Məftunə Abdullayeva, Ağsaqqallar Şurasının sədr müavini, Əməkdar müəllim Ruhangiz Abdullayeva və digər çıxış edənlər milli-mənəvi dəyərlərin qorunmasının, ailə və məktəb əməkdaşlığının və gənc nəslin vətənpərvərlik ruhunda formalaşdırılmasının vacibliyini vurğulayıb, şagirdlərə tövsiyələrini çatdırıblar. Dilimizin, tariximizin, adət-ənənələrimizin milli kimliyimizin əsas dayaqları olduğu qeyd olunub. Bildirilib ki, milli-mənəvi dəyərlərimizi yaşatmaq və qorumaq hər birimizin vətəndaşlıq borcudur və bu dəyərlərə sahib çıxan gənclik Azərbaycanın parlaq gələcəyinin təminatıdır.
Sonra tədbir iştirakçıları milli-mənəvi dəyərlərimizi əks etdirən guşə ilə tanış olublar. Şagirdlər tərəfindən təqdim edilən bədii kompozisiyalar, vətənpərvərlik mövzusunda şeirlər və səhnəciklər tədbirə xüsusi rəng qatıb.