Xocalı soyqırımının 34-cü ildönümü ilə əlaqədar İstanbulda konfrans keçirilib.
“Tehsil365" xəbər verir ki, tədbir “KİAMP – Karabakh is Azerbaijan” Milli Platformasının Türkiyə Respublikası üzrə Baş Koordinatorluğu və onun nəzdində fəaliyyət göstərən “Qarabağ Azərbaycandır” Koordinasiya Dərnəyi tərəfindən Türk Ocaqları İstanbul şöbəsinin ev sahibliyi ilə təşkil olunub. Tədbirdə Azərbaycan və Türkiyənin Dövlət himnləri səsləndirilib, şəhidlərin xatirəsi yad edilib.
Türkiyədə təhsil alan İsa Quluzadə və Elnarə Məmmədrzayevanın aparıcılığı ilə baş tutan mərasimdə “Qarabağ Azərbaycandır” Koordinasiya Dərnəyinin hazırladığı xüsusi videoçarx nümayiş etdirilib. Videoçarxda 18 müxtəlif ölkədə yaşayan gənc Xocalı soyqırımı həqiqətlərini BMT-nin Təhlükəsizlik Şurasınin qətnamələri kontekstində beynəlxalq ictimaiyyətə çatdırıblar.
Konfransın rəsmi hissəsində çıxış edən “KİAMP – Karabakh is Azerbaijan” Milli Platformasının Türkiyə üzrə baş koordinatoru Elvin Abdurahmanlı Xocalıda baş verən faciənin unudulmamasının və beynəlxalq hüquq çərçivəsində ədalət mübarizəsinin davam etdirilməsinin vacibliyini vurğulayıb.
Tədbirdə Qazaxıstanın İstanbuldakı ilk Baş konsulu və TÜRKSOY-un İstanbul nümayəndəsi Yerjan Uasis, TOYŞAD Dərnəyinin sədri Gökalp Şentürk, eləcə də tədqiqatçı-jurnalist Cihan Fulser Türk dünyasının həmrəyliyinin əhəmiyyətindən və Xocalı həqiqətlərinin qlobal miqyasda tanıdılmasının zəruriliyindən danışıblar.
Tədbirin Caner Karakuşun moderatorluğu ilə keçirilən panel iclasında ehtiyatda olan briqada generalı, professor Esat Arslan və Elvin Abdurahmanlının Xocalı və Qarabağ məsələsinin hərbi, siyasi və hüquqi aspektlərdən təhlili dinlənilib.
Konfrans çərçivəsində “Qarabağ Azərbaycandır” Koordinasiya Dərnəyi ilə Türk Akademiklər Birliyi arasında qarşılıqlı strateji razılaşma və əməkdaşlıq memorandumu imzalanıb, iştirakçılara xüsusi plaketlər təqdim edilib.