“Rəsm çəkəndə özümü daha rahat hiss edirəm. Sevinəndə parlaq rənglərdən istifadə edirəm, təbiət və fantaziya rəsmləri çəkməyi isə xüsusilə sevirəm.”
Bu fikirləri “Tehsil365”ə müsahibəsində Hədəf Liseyinin 4-cü sinif şagirdi Yusif Quliyev bildirib.
Rəsm çəkməyə nə vaxt və necə başladın?
—Mən rəsm çəkməyə 5 yaşım olanda başlamışam. Əvvəlcə evdə sadə şəkillər çəkirdim. Sonra müəllimim rəsmlərimi bəyəndi və məni daha çox məşq etməyə həvəsləndirdi.
Rəsm sənə nəyi ifadə etməyə kömək edir?
— Rəsm mənə hisslərimi göstərməyə kömək edir. Sevinəndə rəngli və parlaq şəkillər çəkirəm. Bəzən isə təbiət və heyvanlar çəkərək öz fikirlərimi ifadə edirəm.
Hansı rəng və ya üslubları işlətməyi sevirsən?
— Mən ən çox mavi və yaşıl rəngləri sevirəm. Təbiət rəsmləri, dağlar, ağaclar və dəniz çəkməyi xoşlayıram. Bəzən də fantaziya rəsmləri çəkirəm.
Məktəb və rəsm məşğələləri necə balanslaşdırırsan?
— Əvvəl dərslərimi edirəm, sonra boş vaxtımda rəsm çəkirəm. Həftə sonları isə daha çox vaxt ayıra bilirəm. Çalışıram ki, həm dərslərim, həm də rəsmlərim yaxşı olsun.
Gələcəkdə rəsm və sənətlə bağlı hansı hədəflərin var?
— Gələcəkdə daha gözəl rəsmlər çəkmək və sərgidə iştirak etmək istəyirəm. Rəsm sahəsində özümü inkişaf etdirmək və insanlara gözəl əsərlər göstərmək arzumdur.
