Bu gün rus romantizminin görkəmli nümayəndələrindən biri, şair Yevgeni Baratınskinin anadan olmasının ildönümüdür.
“Tehsil365”in məlumatına görə, Yevgeni Abramoviç Baratınski 2 mart 1800-cü ildə Tambov quberniyasının Mara qəsəbəsinin Vyajla kəndində soylu ailədə dünyaya gəlib. İlk təhsilini evdə alıb. 1808-ci ildə ailəsi ilə birlikdə Moskvaya köçüb, 1812-ci ildə isə təhsilini davam etdirmək üçün Sankt-Peterburqa göndərilib.
Gənclik illərində adı məktəbdə baş vermiş qalmaqallı hadisəyə qarışdığı üçün imperatorun qərarı ilə məktəbdən xaric edilib və dövlət qulluğunda işləməsi qadağan olunub. Yalnız sıravi əsgər kimi xidmət etməsinə icazə verilib. 1819-cu ildə hərbi xidmətə başlayıb, 1820-ci ildə astsubay rütbəsinə yüksəlib və Finlandiyada xidmət edib. 1826-cı ildə ordudan ayrılıb.
Baratınski ədəbi fəaliyyətə erkən yaşlarından başlayıb. O, Aleksandr Puşkin, Anton Delviq və Vasili Jukovski kimi dövrün tanınmış ədibləri ilə yaxın münasibətdə olub. 1826-cı ildə “Eda” poemasını nəşr etdirib, 1828-ci ildə “Balo”, 1829-cu ildə isə “Cariye” (sonradan “Qaraçı” adı ilə yenidən işlənib) əsərini yazıb. 1832-ci ildə “Goethenin ölümü üzərinə” şeirini qələmə alıb.
1830–1840-cı illərdə müxtəlif ədəbi nəşrlərdə fəaliyyət göstərib. 1843-cü ildə Avropaya səyahət edib, 1844-cü ildə Neapola gedərkən “Buxarlı gəmi” şeirini yazıb. Həmin il iyunun 11-də Neapolda vəfat edib. Cənazəsi Sankt-Peterburqa gətirilərək Aleksandr Nevski monastırında dəfn olunub.
Fəlsəfi dərinliyi, melanxolik və bədbin ruhlu şeirləri ilə seçilən Baratınski XIX əsr rus poeziyasının aparıcı simalarından biri hesab olunur və Puşkinin çağdaşı kimi dövrünün ikinci böyük şairi kimi qiymətləndirilib.