Azərbaycanın dövrünün tanınmış siyasi və ictimai xadimi, Azərbaycan Xalq Cümhuriyyətinin qurucularından biri, Əkbər ağa Şeyxülislamov bu gün xatırlanır.
“Tehsil365”in məlumatına görə, Əkbər ağa İbrahim oğlu Şeyxülislamov 1891-ci ildə İrəvan şəhərində anadan olmuş, orta təhsilini İrəvan gimnaziyasında tamamlamış və 1912-ci ildə Peterburq Yol Mühəndisliyi İnstitutua daxil olmuşdur. 1917-ci ildə ali təhsilli mütəxəssis kimi vətənə qayıdan Şeyxülislamov 1918-ci ildə Zaqafqaziya Seyminin üzvü seçilmiş, “Hümmət” partiyasına daxil olmuş və Türkiyə hökuməti ilə sülh danışıqları aparan nümayəndə heyətində iştirak etmişdir.
O, Azərbaycan Xalq Cümhuriyyətinin İstiqlal bəyannaməsini imzalayanlardan biri olub, birinci hökumətdə əkinçilik naziri vəzifəsini tutmuş və Bakıda açılmış parlamentin üzvü seçilmişdir. 1919-cu ildə Versal sülh konfransında Azərbaycanın nümayəndə heyəti tərkibində iştirak edən Şeyxülislamov, 1920-ci ildən Parisdə yaşayıb, II İnternasionalın üzvü kimi siyasi fəaliyyətini davam etdirmişdir.
Əkbər ağa Şeyxülislamov 1961-ci il 2 mart tarixində vəfat etmiş, Paris yaxınlığındakı müsəlman qəbiristanlığında dəfn olunmuşdur. Onun fəaliyyəti və yazıları bu gün də Azərbaycan tarixində əvəzsiz irs olaraq xatırlanır.