AMEA Rəyasət Heyətinin elmi katibi Coşqun Məmmədovun “Azərbaycanda bərpaolunan enerji müəssisələrinin inkişafının stimullaşdırılması” adlı monoqrafiyası işıq üzü görüb.
Akademiyadan “Tehsil365"ə bildirilib ki, monoqrafiyada bərpaolunan enerji müəssisələrinin inkişaf istiqamətləri və bu prosesi dəstəkləyən təşviq siyasətinin iqtisadi, institusional və idarəetmə mexanizmləri sistemli şəkildə tədqiq olunur. Müəllif bərpaolunan enerji sektorunun formalaşmasının milli iqtisadiyyat üçün strateji əhəmiyyətini əsaslandırır, mövcud stimullaşdırma alətlərinin effektivliyini qiymətləndirir və inkişafın davamlılığını təmin edən yeni iqtisadi modellər irəli sürür.
Monoqrafiya enerji siyasəti, iqtisadi inkişaf və ekoloji idarəetmə sahəsində fəaliyyət göstərən mütəxəssislər, alimlər, doktorantlar, magistrantlar və geniş oxucu auditoriyası üçün nəzərdə tutulur.
Nəşrin elmi redaktoru iqtisad elmləri doktoru, professor Fərhad Rəhmanov, rəyçilər iqtisad üzrə fəlsəfə doktoru, dosent Allahyar Muradov və iqtisad üzrə fəlsəfə doktoru, dosent Sədaqət İbrahimovadır. Naşir filologiya üzrə fəlsəfə doktoru Səbuhi Qəhrəmanov, məsul redaktor filologiya üzrə fəlsəfə doktoru Töhfə Talıbovadır.
Kitab “Elm” nəşriyyatında çap edilib.