Misirli jurnalistlər mayın 17-dən 22-dək Bakıda “Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri” devizi altında keçiriləcək Ümumdünya Şəhərsalma Forumunun işıqlandırılmasında yaxından iştiraka dəvət edilib.
“Tehsil365" xəbər verir ki, bu, Ramazan ayı münasibətilə Azərbaycanın Qahirədəki səfirliyinin təşkil etdiyi iftar süfrəsi ətrafında Misirin aparıcı media nümayəndələri ilə keçirilən görüşdə səsləndirilib.
Səfir Elxan Poluxov Misir və Azərbaycan arasında tarixən mövcud mədəni bağlar və bu gün inkişaf edən siyasi əlaqələr barədə danışıb. Media təmsilçilərinin xalqların bir-birinə daha da yaxınlaşmasında, mədəni irsin təbliğində rolunu vurğulayıb. Regionda sabitliyin möhkəmləndirilməsi istiqamətində beynəlxalq səylərə toxunan diplomat Azərbaycan Prezidenti İlham Əliyevin beynəlxalq sülh təşəbbüslərinin gücləndirilməsi və reallaşdırılması çərçivəsində fəaliyyəti barədə danışıb.
Eyni zamanda, Misir mediasının Azərbaycanla bağlı fəaliyyətləri daim diqqətdə saxladığı bildirilib. Qeyd olunub ki, 1993-cü il fevralın 26-da erməni silahlıları tərəfindən Azərbaycan xalqına qarşı törədilmiş Xocalı soyqırımının 34-cü ildönümü, eləcə də 31 Mart – Azərbaycanlıların Soyqırımı Günü münasibətilə yerli mediada silsilə yazılar dərc olunur.
Vurğulanıb ki, Azərbaycan dayanıqlı şəhərsalma və urbanizasiya sahəsində beynəlxalq əməkdaşlığa böyük önəm verir. Bu baxımdan Misirin Ümumdünya Şəhərsalma Forumunda fəal iştirakına ümid edilir.
Tədbirdə, həmçinin Azərbaycan və Misirdə Ramazan ənənələri barədə fikir mübadiləsi aparılıb. Bu mübarək ayın birlik, dözümlülük və xeyirxah dəyərləri təcəssüm etdirdiyi qeyd edilib. Misir xalqına bu mübarək ay münasibətilə sabitlik və rifah arzulanıb.