3 nömrəli Uşaq-Gənclər İnkişaf Mərkəzində “Vokal” dərnəyinin üzvləri tərəfindən musiqisi Sevinc Tofiqqızına, sözləri şair Baba Vəziroğluya məxsus “Hökumə – Səma ulduzu” adlı mahnı və klipin təqdimatı olunub.
“Tehsil365" xəbər verir ki, əvvəlcə şəhidlərin xatirəsi bir dəqiqəlik sükutla yad edilib, sonra Dövlət Himni səsləndirilib.
Qeyd edək ki, layihə 2024-cü ildə təyyarə qəzasında həlak olmuş Milli Qəhrəman Hökumə Əliyevanın xatirəsinə həsr olunub. Layihənin rəhbəri Sevinc Tofiqqızıdır.
Tədbirdə çıxış edən Milli Qəhrəman, şəhid general-mayor Polad Həşimovun bacısı Kəmalə Həşimova vurğulayıb ki, gənclər bu qəhrəmanları özlərinə örnək götürməli, onların həyat yolundan nümunə almalıdırlar. O, gənclərə həyatlarını pis vərdişlərdən uzaq tutaraq bu cür mədəniyyət ocaqlarında bir araya gəlməyi, sənətə yiyələnməyi, insanlıq və humanizm naminə faydalı işlər görməyi arzulayıb.
Azərbaycanın Milli Qəhrəmanı İqor Kşnyakinin həyat yoldaşı Yana Kşnyakina klipin ərsəyə gəlməsində əməyi olan hər kəsə dərin minnətdarlığını bildirib və qeyd edib ki, bu ekran işi ona bir çox məqamda həyat yoldaşını xatırladır.
Daha sonra “Hökumə – Səma ulduzu” klipi nümayiş olunub.
Hökumə Əliyevanın anası Kəmalə Əliyeva çıxışında layihənin ərsəyə gəlməsində əməyi olan hər kəsə təşəkkürünü çatdırıb.
Layihənin müəllifləri Sevinc Tofiqqızı və klipin rejissoru Xalid Əliyev də layihəyə dəstək göstərən və yaradıcı prosesdə iştirak edən hər kəsə minnətdarlıqlarını bildiriblər.
Mərkəzin direktoru Lalə Qəti qeyd edib ki, belə görüşlərin keçirilməsi uşaqların dünyagörüşünün formalaşması, milli-mənəvi dəyərlərin aşılanması baxımından olduqca önəmlidir.
“Uşaqlarımız qəhrəmanlarımızın həyat yolunu örnək tutaraq Polad Həşimovlar, Mübarizlər kimi Vətənə xidmət edən, ləyaqətli, cəsur və məsuliyyətli insanlar olmalıdırlar. Bu cür görüşlər gənclərdə vətən sevgisini, vətəndaşlıq mövqeyini və tariximizə hörmət hissini daha da möhkəmləndirir”, – deyə o əlavə edib.
Proqram çərçivəsində “Vokal” qrupunun ifasında “General Polad” mahnısı səsləndirilib. İqor Kşnyakinin qızları Darya və Nastyanın ifasında “Səma qəhrəmanları” mahnısı təqdim olunub.