Onun sözlərinə görə, “fərdin kognitiv sxemləri, emosional tənzimləmə bacarıqları və davranış modelləri sosial münasibətlərin strukturunu formalaşdırır. Bu baxımdan insan psixologiyası cəmiyyətin dəyişməsində əsas determinant rolunu oynayır.”
Psixoloq Mətanət Əliyeva “Təhsil365”ə verdiyi açıqlamada vurğulayıb ki, cəmiyyət sosial sistem olaraq fərdlərin psixoloji xüsusiyyətləri üzərində qurulur.
Əliyeva qeyd edib ki, emosional intellekt və özünüdərk səviyyəsi yüksəldikcə insanlar arasında konfliktlərin konstruktiv həlli artır. “Bu isə sosial harmoniyanın güclənməsinə səbəb olur” – deyə psixoloq bildirib.
O, həmçinin psixoloji maariflənmənin və travmatik təcrübələrin işlənməsinin vacibliyini önə çəkib: “Travmatik təcrübələrin düzgün işlənməsi aqressiya və zorakı davranışların azalmasına gətirib çıxarır. Sağlam psixoloji mühit isə ailə və təhsil institutları vasitəsilə cəmiyyətə ötürülür.”
Psixoloq əlavə edib ki, daxili lokus nəzarətə malik fərdlər sosial məsuliyyət hissi ilə hərəkət edir və dəyişimin subyekti olurlar. Onun sözlərinə görə, “fərdi psixoloji inkişaf kollektiv şüurun transformasiyasına zəmin yaradır.”
Mətanət Əliyeva yekun olaraq bildirib ki, cəmiyyətin davamlı və keyfiyyətli inkişafı birbaşa fərdlərin psixoloji sağlamlığından asılıdır. “Psixoloji maariflənmənin gücləndirilməsi, emosional intellektin inkişafı və travmatik təcrübələrin düzgün işlənməsi sosial münasibətlərin sağlamlaşmasına və cəmiyyətin davamlı inkişafına mühüm töhfə verəcək” – deyə o vurğulayıb.