Azərbaycan Milli Elmlər Akademiyasının (AMEA) Mərkəzi Elmi Kitabxanasının (MEK) tərtibatında AMEA-nın müxbir üzvü, tarix elmləri doktoru, professor, görkəmli arxeoloq-alim İlyas Babayevin 90 illik yubileyi münasibətilə alimin həyatı və elmi fəaliyyətini əks etdirən biblioqrafik göstərici hazırlanıb.
“Tehsil365“ AZƏRTAC-a istinadən xəbər verir ki, MEK-dən bildirilib ki, İlyas Babayev ömrünü Qafqaz Albaniyası tarixşünaslığının formalaşması və inkişafına, eləcə də Qəbələ bölgəsinin tarixi-mədəni irsinin sistemli tədqiqinə həsr edib. O, Qafqaz və İranın Antik dövr arxeologiyası üzrə dünyada tanınmış mütəxəssislərdən biri olub.
İlyas Babayev 270-dən çox elmi əsərin, xarici ölkələrdə nəşr olunmuş 80-dən çox elmi məqalənin müəllifidir. Onun rəhbərliyi ilə 12 namizədlik dissertasiyası müdafiə olunub.
AMEA Rəyasət Heyətinin qərarına əsasən “Görkəmli elm xadimləri” seriyası altında tərtib olunan biblioqrafik göstəricinin elmi redaktoru MEK-in direktoru texnika elmləri doktoru Hüseyn Hüseynovdur. Vəsaitin redaktorları Biblioqrafiya şöbəsinin müdiri, filologiya üzrə fəlsəfə doktoru Aytən Əliyeva və Elmi biblioqrafiya sektorunun rəhbəri Nərgiz Novruzova, tərtibçisi isə baş biblioqraf Təranə Rüstəmovadır.
Göstərici İlyas Babayevin həyat və fəaliyyətinin bütün sahələrini əks etdirir. Nəşrdə İ.Babayevin əsərləri, redaktə etdiyi və rəy verdiyi əsərlər, iştirak etdiyi konfranslar, elmi rəhbərlik etdiyi dissertantlar, həmçinin rəhbərlik etdiyi arxeoloji ekspedisiyalar və s. haqqında məlumatlar verilir.
Biblioqrafiya tarixçilər, arxeoloq və etnoqraflar, elmi tədqiqatçılar, həmçinin geniş oxucu kütləsi üçün nəzərdə tutulub. Nəşrin elektron versiyası ilə kitabxananın saytında tanış olmaq mümkündür.