Ağdam rayonunun Quzanlı qəsəbəsindəki Muğam Mərkəzində "Ayrılıqdan keçən yol" sənədli filminin təqdimatı olub.
“Tehsil365" AZƏRTAC istinadən xəbər verir ki, AZƏRTAC-in bölgə müxbiri məlumat verib, şəhid ailələrinin, qazilərin və rayon ictimaiyyətinin nümayəndələrinin iştirak etdiyi tədbirdə əvvəlcə Azərbaycanın Dövlət Himni səsləndirilib, Ulu Öndər Heydər Əliyevin və şəhidlərin xatirəsi bir dəqiqəlik sükutla yad edilib. Sonra sənədli film nümayiş olunub.
"Ayrılıqdan keçən yol" sənədli filmi 44 günlük Vətən müharibəsi və 1 günlük lokal xarakterli antiterror əməliyyatı zamanı şəhadətə ucalan 5 nəfər Azərbaycan hərbçisindən bəhs edir. Ekran əsərində əslən Ağdam rayonunun Bağbanlar, İsmayılbəyli, Saybalı və Pirzadlı kəndlərindən olan bu hərbçilərin həyat yoluna və döyüşlərdə iştirakına doğmalarının dili ilə işıq tutulur.
Filmdə, həmçinin Qarabağ müharibəsinin başladığı illərdə sözügedən yaşayış məntəqələrində baş verən hadisələr, həmin kəndlərdən olan neçə-neçə Vətən oğlunun yaranmaqda olan Azərbaycan Ordusuna qoşulmasından, ərazi bütövlüyünün qorunmasında göstərdiyi xidmətlərə də toxunulur.
Tədbirdə çıxış edən Ağdam Rayon İcra Hakimiyyətinin başçısı Vaqif Həsənov, şəhid atası Mehman Göyüşov, şəhid anası Maya Quliyeva və başqaları Müzəffər Ali Baş Komandan İlham Əliyevin rəhbərliyi ilə Azərbaycan Ordusunun 44 günlük Vətən müharibəsində qazandığı şanlı Qələbədən, antiterror tədbirləri nəticəsində ölkəmizin suverenliyinin bərpa olunmasından danışıb, ekran əsərinin çəkilişində zəhməti olan yaradıcı və texniki heyətə təşəkkür edib, belə filmlərin davamlı çəkilməsinin vacibliyini vurğulayıblar.
Filmin ssenari müəllifi və rejissoru Teymur Zahidoğlu filmin çəkilişi ilə bağlı təssüratlarını bölüşüb, qəhrəman Vətən oğullarının cəmiyyətə tanıdılması üçün bu istiqamətdə fəaliyyətini davam etdirəcəyini diqqətə çatdırıb.
Qeyd edək ki, sənədli film 2025-ci ildə "Vətən Media" Yaradıcılıq Qrupu tərəfindən istehsal edilib və Mədəniyyət Nazirliyi tərəfindən yayım vəsiqəsi ilə təmin olunub.