Təhsildə uğurun əsas şərti – düzgün idarəetmə və disiplin
Azərbaycanda təhsil sahəsində son illər müxtəlif layihələr həyata keçirilsə də, hələlik nəzərəçarpacaq müsbət nəticələrin əldə olunmadığı bildirilir. Bunu təhsil üzrə ekspert Elçin Muradov “Tehsil365”ə açıqlamasında bildirib. Ekspertin fikrincə, bunun əsas səbəbi məktəblərdə disiplin və nəzarət mexanizmlərinin yetərincə formalaşmamasıdır.
Ekspert vurğulayır ki, məktəblərdə uğur və inkişaf əldə etməyin birinci yolu məhz nizam-intizam məsələsinin qaydasına salınmasından keçir:
“Məktəblərdə nə qədər müxtəlif layihələr həyata keçirilsə də, uğur əldə etməyin birinci yolu disiplin məsələsini həll etməkdir. Şagirdlərin nəzarət sistemi düzgün qurulmalıdır. Əgər bu təmin olunarsa, o zaman keyfiyyətli nəticədən danışmaq mümkündür.”
Onun sözlərinə görə, yalnız nəzəriyyə üzərində qalan və praktik tətbiqi zəif olan layihələr gözlənilən effekti vermir:
“Layihə praktikaya keçirilə bilmirsə, keyfiyyətli nəticədən söhbət getmək çətindir. Layihələr bəlkə də keyfiyyətlidir, amma şagirdlərin düşüncə tərzi və hazırlıq səviyyəsi onları tam qavramağa imkan vermir.”
Ekspert hesab edir ki, hər hansı yeniliyi tətbiq etməzdən əvvəl şagirdlərin həmin sahə üzrə maarifləndirilməsi və uyğun mühitin formalaşdırılması vacibdir. Əsas məsələ layihəni ləğv etmək deyil, onun icra mexanizmini düzgün qurmaqdır.
Sonda o qeyd edir ki, dərsdə disiplinin qorunması, müəllim-şagird münasibətlərində idarəetmənin düzgün qurulması və müəllimin nüfuzunun bərpası təhsildə real və davamlı nəticələrin əldə olunmasına şərait yarada bilər.