"İmtahan ərəfəsində şagirdin ən çox ehtiyac duyduğu şey təzyiq deyil, dəstəkdir.”
Bu fikirləri “Tehsil365"ə açıqlamasında müəllim Validə Tağıyeva bildirib.
Müəllim qeyd edib ki, imtahan öncəsi yaranan həyəcan müəyyən səviyyədə normaldır və hətta motivasiyaedici ola bilər. Lakin nəzarətsiz stress şagirdin diqqətinə və özünə inamına mənfi təsir göstərir.
"Bəzi şagirdlər imtahan zamanı panika yaşayır, bu isə onların fikrini toplamasına mane olur. Halbuki eyni şagird dərs prosesində mövzunu yaxşı mənimsəmiş olur," — deyə o vurğulayıb.
Onun sözlərinə görə, valideynlərin davranışı bu mərhələdə həlledici rol oynayır.
"Valideyn uşağa güvəndiyini hiss etdirməlidir. Müqayisə və təzyiq əvəzinə anlayış və motivasiya daha təsirlidir," — deyə müəllim əlavə edib.
Validə Tağıyeva bildirib ki, düzgün vaxt bölgüsü, planlı hazırlıq və kifayət qədər istirahət imtahan stressinin azalmasına kömək edir.
"Şagird öz gücünə inanmalı və nəticəni həyatının sonu kimi qəbul etməməlidir. İmtahan bir mərhələdir, amma həyat bundan ibarət deyil," — deyə o qeyd edib.