Azərbaycan Milli Elmlər Akademiyası (AMEA) Folklor İnstitutunun direktoru, filologiya elmləri doktoru Hikmət Quliyev Ankarada UNESCO Türkiyə üzrə Milli Komissiyasının sədri, professor Mehmet Öcal Oğuzla görüşüb.
İnstitutdan “Tehsil365"ə bildirilib ki, görüşdə Hikmət Quliyev AMEA Folklor İnstitutunda aparılan elmi-tədqiqat işləri, əldə olunan nəticələr, institutun strukturu, elmi-metodoloji baxımdan yenilənmə prosesi, folklorun dinamik mədəni sistem kimi dərk olunması və araşdırılması istiqamətində görülən işlər, rəqəmsal transformasiyalar və internet folkloru sahəsində həyata keçirilən araşdırmalar barədə ətraflı məlumat verib. Qeyd olunub ki, müasir mərhələdə folklorun yalnız mətn kimi deyil, kollektiv mədəni yaddaş, milli kimlik və sosial kommunikativ sistemi kimi öyrənilməsi prioritet istiqamət olaraq müəyyənləşdirilib.
UNESCO-nun Bəşəriyyətin Qeyri-Maddi Mədəni İrs üzrə Reprezentativ Siyahısına daxil edilmiş çoxmillətli irs nümunələrinin qorunması, sənədləşdirilməsi və nəsildən-nəslə ötürülməsi məsələləri ətrafında fikir mübadiləsi aparılıb, bu sahədə mümkün elmi və institusional əməkdaşlıq perspektivləri müzakirə edilib. Xüsusilə türk xalqlarının ortaq qeyri-maddi mədəni irs elementlərinin birgə tədqiqi və beynəlxalq platformalarda təqdimatı istiqamətində əməkdaşlığın əhəmiyyəti vurğulanıb.
Görüş çərçivəsində Hikmət Quliyev professor M.Öcal Oğuza türk folklorunun metodoloji əsaslarla araşdırılması, qorunması və beynəlxalq elmi-mədəni mühitdə tanıdılmasına verdiyi töhfələrə görə plaket təqdim edib. Eyni zamanda o, Folklor İnstitutu tərəfindən nəşr olunan “Qərbi Azərbaycan folkloru” seriyasından 5 cild kitabı, müəllifi olduğu müdrik qoca arxetipi və internet folkloru ilə bağlı monoqrafiyalarını türkiyəli professora təqdim edib.
Görüşdə Ankara Hacı Bayram Vəli Universitetinin professoru Konuralp Ercilasun, Folklor İnstitutunun əməkdaşı, dosent Aynur İbrahimova və UNESCO üzrə Türkiyə Milli Komissiyasının baş katib müavini vəzifəsini icra edən Özge Züleyha Ömeroğlu da iştirak ediblər.
Sonda Hikmət Quliyevə UNESCO Türkiyə üzrə Milli Komissiyasının nəşr etdiyi nüfuzlu kitablar toplusu hədiyyə olunub.
