Azərbaycan Dillər Universitetində (ADU) “Qayıdış hüququ və gənclərin rolunun artırılması” mövzusunda seminar keçirilib.
ADU-dan “Tehsil365"ə bildirilib ki, seminar Mədəniyyət Nazirliyinin dəstəyi, Mədəniyyət üzrə Elmi-Metodiki və İxtisasartırma Mərkəzi (MEMİM) və Qərbi Azərbaycan İcmasının tərəfdaşlığı, “İRƏLİ” İctimai Birliyinin (İB) təşkilatçılığı ilə həyata keçirilən “Qərbi Azərbaycan irsini tanı” layihəsi çərçivəsində reallaşıb.
Seminar “Balabançı” ansamblının ifasında Dövlət Himninin səsləndirilməsi ilə başlanıb. Sonra ictimai birlik tərəfindən Qərbi Azərbaycanın mədəni irsinin təbliği məqsədilə təşkil olunan konfrans, festival, düşərgə və infosessiyalar barədə məlumat verilib.
“İRƏLİ” İB-nin sədri Şahin Rəhmanlı, MEMİM-in direktoru Vüqar Hümbətov, ADU-nun elm və innovasiya məsələləri üzrə prorektoru Həmidə Əliyeva, Qərbi Azərbaycan TV-nin rəhbəri Telli Pənahqızı, Qərbi Azərbaycan İcmasının əməkdaşı Cəmilə Fəyyaz çıxışlarında qayıdış hüququnun gənc nəslə düzgün və sistemli şəkildə çatdırılmasının vacibliyini vurğulayıblar. Bildirilib ki, milli yaddaşın qorunması və tarixi həqiqətlərin gələcək nəsillərə ötürülməsi dövlət siyasətinin prioritet istiqamətlərindən biridir.
Daha sonra “İrəvan məktəbi və onun nümayəndəsi olan böyük şəxsiyyətlər”, “Qərbi Azərbaycana qayıdış hüququ və gənclərin fəaliyyətinin stimullaşdırılması” və “Region gənclərinin Qərbi Azərbaycana qayıdış prosesində fəallığı: təşəbbüs və ideyaların dəstəklənməsi” mövzularında məruzələr dinlənilib.
Tədbir bədii hissə ilə davam edib.
