Bakı Dövlət Universitetinin Şərqşünaslıq fakültəsində türkoloq-alim, filologiya elmləri doktoru, professor Tofiq Məliklinin “100 illik Qurultay işığında türkologiyanın inkişaf yolları” mövzusunda ustad dərsi keçirilib. Ustad dərsi 27 Mart – Azərbaycanda Elm Gününə həsr olunmuş tədbirlər çərçivəsində təşkil edilib.
BDU-dan “Tehsil365"ə bildirilib ki, professor Tofiq Məlikli ustad dərsində XX əsrin əvvəllərində keçirilmiş Birinci Türkoloji Qurultayın Türk dünyası üçün əhəmiyyəti, onun elmi irsinin müasir türkologiyanın formalaşmasına təsirini geniş təhlil edib. Məruzədə Qurultayın ortaq əlifba, dil birliyi, terminologiya və milli-mədəni kimlik məsələlərinin müzakirəsində oynadığı rola xüsusi diqqət yetirilib. Professor Tofiq Məlikli türkologiyanın keçdiyi inkişaf mərhələlərini elmi faktlar əsasında şərh edib, 100 illik elmi irsin bu gün də aktual olduğunu vurğulayıb. O, müasir dövrdə türkologiyanın yalnız filoloji sahə kimi deyil, həm də mədəniyyətlərarası əlaqələrin, diplomatik münasibətlərin və regional əməkdaşlığın mühüm istiqaməti kimi dəyərləndirildiyini qeyd edib.
