Doktoranturada təhsil alan və ya təhsilini bitirmiş iddiaçıların xarici dillər, habelə əcnəbilərin Azərbaycan dili imtahanının nəticələri elan olunub.
Dövlət İmtahan Mərkəzindən (DİM) “Tehsil365"ə bildirilib ki, 250 iddiaçı xarici dillər (ingilis, alman, fransız), 1 nəfər isə Azərbaycan dili üzrə imtahanda iştirak edib. 89 nəfər xarici dil üzrə fəlsəfə doktoru imtahanı üçün müəyyən edilmiş şərtləri ödəyib.
Həm xarici dil üzrə fəlsəfə doktoru imtahanında, həm də əcnəbi və vətəndaşlığı olmayan iddiaçılar üçün Azərbaycan dili üzrə fəlsəfə doktoru imtahanında iddiaçıların hər bir test tapşırığına düzgün cavabı bir balla qiymətləndirilir, səhv cavablar düzgün cavabların nəticəsinə təsir göstərmir. Hər blok üzrə tapşırıqlar 10 ballıq şkala üzrə qiymətləndirilir. İmtahanda toplanıla biləcək maksimal bal 50-dir.
Dinləyib-anlama, oxuyub-anlama, dildən istifadə (leksik-qrammatik tapşırıqlar), yazı və danışıq bloklarının hər biri üzrə balların minimum 20 faizini, ümumilikdə isə xarici dil üzrə fəlsəfə doktoru imtahanından azı 30 bal toplamış iddiaçılar və əcnəbilər üçün Azərbaycan dili üzrə fəlsəfə doktoru imtahanından azı 25 bal toplamış iddiaçılar imtahanın nəticəsinə qoyulan tələbi ödəmiş hesab edilirlər.
Xatırladaq ki, DİM fevralın 15-də xarici dillər üzrə fəlsəfə doktoru imtahanı (fevralın 16-da əcnəbilər üçün Azərbaycan dili imtahanı) keçirib. Fevralın 19-da isə iddiaçıların danışıq bacarıqları yoxlanılıb.
İmtahan nəticələri ilə bağlı Apellyasiya Komissiyasına müraciət etmək istəyənlər martın 5-6-da saat 10:00-dan 17:00-dək DİM-in əsas inzibati binasına yaxınlaşıb ərizə yazmalıdırlar. Ünvan: Bakı şəhəri, akademik Həsən Əliyev küçəsi, 299
Müraciətlər martın 11-dən etibarən telefon əlaqəsi vasitəsilə cavablandırılacaq.