Azərbaycanın Özbəkistandakı səfirliyinin nəzdində Heydər Əliyev adına Azərbaycan Mədəniyyət Mərkəzi, Daşkənddə fəaliyyət göstərən Yunus Əmrə Türk Mədəniyyət Mərkəzinin birgə təşkilatçılığı ilə Çanaqqala zəfərinin 111-ci və İstiqlal marşının qəbulunun 105-ci ildönümü münasibətilə tədbir keçirilib.
Bu barədə “Tehsil365"ə Azərbaycan Mədəniyyət Mərkəzindən məlumat verilib.
Bildirilib ki, tədbirdə əvvəlcə Azərbaycan, Türkiyə və Özbəkistanın dövlət himnləri səsləndirilib.
Azərbaycan Mədəniyyət Mərkəzinin direktoru Akif Marifli çıxışında Çanaqqala zəfərinin Türk dünyasının tarixində mühüm yer tutduğunu vurğulayıb. “Biz Çanaqqala zəfərinin şanlı tarixini qeyd edərkən, yalnız bir hərbi qələbəni deyil, bütün Türk dünyasının birlik və həmrəylik ruhunu xatırlayırıq. Ona görə də, bu zəfər təkcə Osmanlı dövlətinin deyil, bütün türk xalqlarının qəhrəmanlıq salnaməsi kimi tarixə düşüb. Təsadüfi deyil ki, Çanaqqala döyüşlərində Anadolu türkləri ilə yanaşı, Azərbaycan türkləri də iştirak edib və qardaş Türkiyənin müdafiəsi uğrunda mübarizə aparıblar. Azərbaycan, Türkiyə və Özbəkistan arasında mövcud olan dostluq və əməkdaşlıq münasibətləri ortaq tarix, mədəniyyət və mənəvi dəyərlərə əsaslanır. Azərbaycan, Türkiyə və Özbəkistanın dövlət başçılarının həyata keçirdikləri siyasət nəticəsində qardaş və dost ölkələr arasında münasibətlər bütün sahələrdə uğurla inkişaf edir və mədəni-humanitar əməkdaşlıq daha da genişlənir. Çanaqqala zəfəri türk xalqlarının birlik və həmrəyliyinin parlaq nümunəsi olaraq gənc nəslin vətənpərvərlik ruhunda tərbiyəsində mühüm rol oynayır”,- deyə o əlavə edib.
Yunus Əmrə Türk Mədəniyyət Mərkəzinin koordinatoru Ahmet Özkan və İstanbul Mədəniyyət Universitetinin təmsilçisi, professor Alim Yılmaz Çanaqqala döyüşlərinin tarixi əhəmiyyəti barədə geniş məlumat veriblər.
Natiqlər, həmçinin İstiqlal marşının qəbulunun türk xalqının milli kimliyinin formalaşmasında mühüm rol oynadığını deyib, Məhməd Akif Ərsoyun bu əsərinin bu gün də Türk dünyasında vətənpərvərlik və azadlıq ideallarının simvolu kimi böyük ehtiramla qarşılandığını bildiriblər.
Görüş çərçivəsində tələbələr görkəmli türk şairi Məhməd Akif Ərsoyun “Çanaqqala” şeirini səsləndiriblər.
Tədbir sual-cavab formasında davam edib.
