Martın 3-də Milli Məclis tərəfindən “Uşaq hüquqları haqqında” yeni Qanunun təsdiqlənməsi bu istiqamətdə atılan çox mühüm və müsbət addımdır.
“Tehsil365“ AZƏRTAC-a istinadən xəbər verir ki,bu fikirləri açıqlamasında “Ümidli” Gələcək Sosial Təşəbbüslər İctimai Birliyinin rəhbəri, uşaq hüquqlarının müdafiəsi üzrə ekspert Kəmalə Aşumova səsləndirib.
Onun sözlərinə görə, bu qanunun ən vacib məqamlarından biri ondan ibarətdir ki, burada uşağın ümdə maraqlarının təmin edilməsi prinsipi əsas götürülür və qəbul edilən mexanizmlər məhz uşaqların təhlükəsizliyinə, rifahına və inkişafına xidmət edir: “Qanunda xüsusilə çətin həyat şəraitində yaşayan və həssas qruplara aid olan uşaqların sosial müdafiəsi, onların hüquqlarının bərpası və müdafiəsi ilə bağlı yeni müddəalar nəzərdə tutulub. Bu yanaşma belə uşaqların vaxtında müəyyən olunması, preventiv tədbirlərin görülməsi, erkən müdaxilə və onlara daha effektiv sosial və psixoloji dəstəyin göstərilməsi üçün əlavə imkanlar yaradır.
Digər mühüm məqam isə ondan ibarətdir ki, uşaqlarla bağlı ağır və ya riskli halların aşkar edilməsi zamanı cəmiyyətin hər bir üzvünün məsuliyyəti və iştirakçılığı vurğulanır. Belə hallarda müvafiq qurumlara, o cümlədən Uşaq Qaynar Xətt xidmətinə məlumat verilməsi mexanizmlərinin gücləndirilməsi uşaqların hüquqlarının qorunmasında multidisiplinar və kompleks yanaşmanın tətbiqinə imkan yaradacaq”.
K.Aşumova bildirib ki, layihədə, həmçinin zorakılığa məruz qalmış uşaqların hüquq-mühafizə orqanlarında dindirilməsi ilə bağlı mühüm yanaşmalar nəzərdə tutulur. Bu proseslər zamanı uşaqların ümdə maraqlarının qorunması, onların hüquqlarının təmin olunması, psixoloqun iştirakı və uşağa həssas yanaşmanın tətbiqi kimi məsələlər xüsusi diqqətdə saxlanılır. Bu isə uşaqların ikinci dəfə travma almamasına və onların hüquqlarının daha effektiv müdafiəsinə xidmət edir.
“Bundan başqa, qanun layihəsində inklüzivlik prinsipi xüsusi vurğulanır. Sənəddə əlilliyi olan uşaqların digər uşaqlarla bərabər əsaslarla təhsil almaq, cəmiyyətə inteqrasiya olunmaq və sosial mühitdə fəal iştirak etmək hüquqları dövlət tərəfindən təmin edilir. Bu yanaşma inklüziv təhsil modelinin genişləndirilməsi və fiziki, əqli, psixoloji çətinlikləri olan uşaqlar üçün maneəsiz mühitin yaradılmasını nəzərdə tutur. Ümumilikdə, qəbul olunan bu dəyişikliklər uşaqların hüquqlarının müdafiəsi sisteminin daha da gücləndirilməsinə, dövlət qurumları, sosial xidmətlər və vətəndaş cəmiyyəti arasında institusional əməkdaşlığın genişlənməsinə mühüm töhfə verəcək”, - deyə o vurğulayıb.