Məmmədli bildirib ki, xaricdə təhsil almaq istəyən hər bir abituriyent yalnız etibarlı və tanınan proqramlara müraciət etməli, seçimində diqqətli olmalıdır.
“Tehsil365”ə verdiyi müsahibəsində təhsil eksperti Məzahir Məmmədli xaricdə təhsil imkanları və bu sahədə mövcud risklər barədə danışıb.
Ekspert bildirib ki, dövlət proqramı vasitəsilə xaricdə bakalavr təhsili almaq istəyən abituriyentlər müvafiq şərtlərə cavab verməlidir:
“Dövlət sifarişi ilə xaricdə bakalavr təhsili almaq istəyən abituriyentlər o şərtlərə, kriteriyalara uyğun cavab verməlidir. Bu normativləri ödəyən hər bir gənc dövlət proqramı hesabına maliyyə dəstəyi ilə xaricdə təhsil ala bilər.”
Məmmədli əlavə edib ki, digər bir yol müxtəlif təqaüd proqramlarıdır. Onun sözlərinə görə, bu proqramlardan yararlanan tələbələr həm maliyyə dəstəyi əldə edir, həm də nüfuzlu universitetlərdə oxumaq imkanı qazanırlar.
Ekspert vurğulayıb ki, Cambridge, SAT, IELTS kimi xüsusi proqramlar üzrə hazırlaşan və özəl liseylərdən məzun olan şagirdlər xaricdə təhsilə daha tez uyğunlaşır:
“Onlar bir neçə xüsusi proqramlar üzrə hazırlaşdıqları üçün normativləri ödəyib imtahan verə bilirlər.”
Məmmədli həmçinin qeyd edib ki, qəbul imtahanlarında uğur qazana bilməyən bəzi abituriyentlər atestatla xarici ölkələrdə – xüsusilə Gürcüstan, Türkiyə, Ukrayna və Rusiyada təhsil almağa üz tuturlar. Lakin bu yolun riskləri var:
“Atestatla qəbul olan tələbələr çox vaxt yaxşı tanınmayan universitetlərdə oxuyurlar. Daha sonra onların diplomu tanınmır və bu həm maliyyə, həm də əlavə 4 il zaman itkisinə səbəb olur.”
Ekspert sosial platformalarda fəaliyyət göstərən bəzi işbazların da bu sahədə aktiv olduğunu vurğulayıb:
“Mən deməzdim ki, hamısı belədir, amma əksəriyyət sosial platformalar üzərindən abituriyentləri cəlb edərək onları atestatla xaricdə təhsil almağa sövq edirlər. Bu isə nəticədə gənclərin keyfiyyətsiz təhsil almasına gətirib çıxarır.”