“Türkiyə–Azərbaycan Universitetində (TAU) magistratura proqramının açılması nəzərdən keçirilir”.
“Tehsil365“ xəbər verir ki, bu barədə universitetin Qida mühəndisliyi proqramının rəhbəri Ümran Uygun "CBC FM"də yayımlanan proqramda məlumat verib.
O bildirib ki, hazırda universitetdə tətbiq olunan modelə əsasən, Hacettepe Üniversiteti bakalavr proqramını həyata keçirir və eyni yanaşma magistr səviyyəsində də tətbiq oluna bilər. Artıq bakalavr səviyyəsində dərs deyən müəllim heyəti magistr tələbələrinə də dərs keçə bilər.
Ümran Uygun qeyd edib ki, bu təşəbbüsə universitet rəhbərliyi müsbət yanaşır. O vurğulayıb ki, imzalanmış ilkin razılaşmalarda əməkdaşlığın yalnız bakalavriat ilə məhdudlaşmadığı əksini tapıb. Bakalavr proqramı ilk mərhələ hesab olunur və növbəti addım kimi magistratura səviyyəsinin yaradılması planlaşdırılır.
O əlavə edib ki, yeni proqramların açılması ilə bağlı qərarlar universitetin Qəyyumlar Şurası tərəfindən qəbul olunur. Heyətin tərkibində müvafiq dövlət qurumlarının nümayəndələri, ali təhsil müəssisələrinin rəhbərləri və Ali Təhsil Şurasının (YÖK) təmsilçiləri yer alırlar. Magistr proqramının açılması məsələsi də həmin heyətin müzakirəsinə çıxarılacaq.