"Uşaqlarda yuxu rejiminin pozulması birbaşa olaraq diqqət və yaddaş problemlərinə səbəb olur."
Bu fikirləri “Tehsil365"ə açıqlamasında nevroloq Aytən Hacıyeva bildirib.
Nevroloq qeyd edib ki, gec yatmaq və kifayət qədər yatmamaq beynin informasiyanı emal etmə və yadda saxlama funksiyasını zəiflədir. Onun sözlərinə görə, bu hal dərs prosesində özünü daha aydın göstərir.
"Yuxu zamanı beyin gün ərzində öyrənilən məlumatları sistemləşdirir. Uşaq kifayət qədər yatmadıqda isə bu proses pozulur," — deyə o vurğulayıb.
O bildirib ki, xüsusilə yeniyetmə yaş dövründə telefon və planşet istifadəsi yuxu rejiminin əsas pozucu amillərindən biridir.
"Ekran qarşısında uzun müddət qalmaq melatonin hormonunun ifrazını azaldır və uşağın gec yatmasına səbəb olur," — deyə nevroloq əlavə edib.
Mütəxəssis valideynlərə tövsiyə edib ki, uşaqlar üçün sabit yuxu saatı müəyyən edilsin və yatmazdan ən azı bir saat əvvəl elektron cihazlardan istifadə dayandırılsın.
"Sağlam yuxu rejimi həm akademik nəticələrə, həm də uşağın ümumi sinir sistemi sağlamlığına müsbət təsir göstərir," — deyə Aytən Hacıyeva qeyd edib.