Bu gün görkəmli ədəbiyyatşünas, tənqidçi və alim Yaşar Qarayevin anım günüdür.
“Tehsil365” xəbər verir ki, Yaşar Vahid oğlu Qarayev 5 mart 1936-cı ildə Nuxa şəhərində (indiki Şəki) anadan olub. O, Azərbaycan ədəbiyyatşünaslığının inkişafında mühüm rol oynamış, elmi-tənqidi fikrin formalaşmasına sanballı töhfələr vermişdir.
1964-cü ildən Azərbaycan Yazıçılar Birliyinin üzvü olan alim uzun illər ərzində həm elmi-pedaqoji, həm də ictimai fəaliyyətlə məşğul olub. 1980-ci ildə filologiya elmləri doktoru elmi dərəcəsini almış, 1985-ci ildə professor adına layiq görülmüşdür. Elmi yaradıcılığı və ədəbiyyat sahəsində xidmətləri dövlət tərəfindən yüksək qiymətləndirilmiş, 1980-ci ildə Azərbaycan SSR Dövlət mükafatına, 1982-ci ildə isə Azərbaycan SSR Əməkdar elm xadimi fəxri adına layiq görülmüşdür.
Yaşar Qarayev 1990-cı ildə Azərbaycan Milli Yaradıcılıq Akademiyasının həqiqi üzvü seçilmiş, 2002-ci ildə isə Azərbaycan Milli Elmlər Akademiyasının müxbir üzvü olmuşdur. Onun tədqiqatları Azərbaycan ədəbiyyatının müxtəlif mərhələlərinin araşdırılmasına, klassik və müasir ədəbi prosesin elmi baxımdan dəyərləndirilməsinə həsr edilib.
Görkəmli alim 25 avqust 2002-ci ildə Bakıda vəfat edib. Yaşar Qarayev Azərbaycan ədəbiyyatşünaslıq elminin inkişafında mühüm xidmətləri ilə xatırlanır.