Burun axması, boğaz ağrısı və öskürəklə müşayiət olunan soyuqdəymə mövsümü yenidən başlayıb. Lakin bahalı dərmanlar almaq əvəzinə, bəzən həll yolu mətbəxinizdə ola bilər və bir fincan qəhvədən belə ucuz başa gələ bilər.
“Tehsil365” bu çayın reseptini təqdim edir:
Soyuqdəymə haqqında nə bilmək lazımdır
Antibiotiklər soyuqdəymə və ya qripə təsir etmir. Çünki bunlar virus mənşəli infeksiyalardır. Böyüklər ildə təxminən 2-3 dəfə soyuqdəymə keçirir, uşaqlarda isə bu daha tez-tez baş verir. Əsas əlamətlərə burun axması və ya tutulması, boğaz ağrısı, öskürək və yüngül hərarət daxildir. Adətən bu əlamətlər 1-2 həftə ərzində keçib gedir.
İçkini necə hazırlamaq olar
Resept çox sadədir: zəncəfil, darçın və qaynar su
Britaniyalı fitoterapiya mütəxəssisi Saymon Mills məsləhət görür ki, təxminən baş barmaq ölçüsündə təzə zəncəfili sürtgəcdən keçirib bir fincana əlavə edin, üzərinə bir çay qaşığı darçın tökün və qaynar su əlavə edin. İsti zəncəfil ağrı reseptorlarını stimullaşdırır, damarların genişlənməsinə kömək edir və tənəffüs yollarında olan seliyin durulaşmasına səbəb olur.
Zəncəfil tərkibində iltihabəleyhinə və antioksidant xüsusiyyətlərə malik bioaktiv maddələr, xüsusilə də ginqerol birləşməsi saxlayır. Darçın da faydalı xüsusiyyətləri ilə tanınır. Darçın laboratoriya şəraitində antimikrob və iltihabəleyhinə təsir göstərir. Lakin bununla bağlı əlavə klinik araşdırmalara ehtiyac var.
Həkimin sözlərinə görə, içkinin istiliyi ağciyərlərin təbii təmizlənmə mexanizmini aktivləşdirir, seliyi daha duru edir və onun bədəndən çıxmasını asanlaşdırır. Mütəxəssislər qeyd edirlər ki, soyuqdəymə üçün “möcüzəvi dərman” mövcud deyil. Lakin isti içkilər əlamətləri yüngülləşdirə və burun tutulmasını azaltmağa kömək edə bilər. Zəncəfil və darçınlı çay istirahət və bol maye qəbulunu əvəz etmir, amma soyuqdəymə günlərini daha rahat keçirməyə kömək edə bilər.(Lent.az)