Elm və Təhsil Nazirliyi İnformasiya Texnologiyaları İnstitutunda Yaponiyanın Kompüter İnsidentlərinə Qarşı Mübarizə və Koordinasiya Mərkəzinin (JPCERT/CC) nümayəndə heyəti ilə görüş keçirilib. Nümayəndə heyəti Mərkəzin Qlobal koordinasiya bölməsinin direktoru Koichiro Komiyama və həmin bölmənin kibertəhlükələr üzrə analitiki Shihono Yonezavadan ibarət olub.
İnstitutdan “Tehsil365"ə bildirilib ki, görüşdə AMEA-nın vitse-prezidenti, institutun baş direktoru akademik Rasim Əliquliyev Azərbaycanda kibertəhlükəsizlik sahəsində ardıcıl və sistemli dövlət siyasətinin həyata keçirildiyini, informasiya təhlükəsizliyinin milli təhlükəsizliyin əsas komponentlərindən biri kimi müəyyənləşdirildiyini vurğulayıb. Bu baxımdan Prezident İlham Əliyev tərəfindən qəbul olunmuş “Azərbaycan Respublikasının informasiya təhlükəsizliyi və kibertəhlükəsizliyə dair 2023–2027-ci illər üçün Strategiyası”nın əhəmiyyətinə toxunub.
Kibertəhdidlərə qarşı mübarizədə beynəlxalq əməkdaşlığın vacibliyini diqqətə çatdıran institutun baş direktoru bu baxımdan Yaponiyanın Kompüter İnsidentlərinə Qarşı Mübarizə və Koordinasiya Mərkəzinin nümayəndələri ilə İnformasiya Texnologiyaları İnstitutunda keçirilən görüşün önəminə diqqət çəkib. Alim belə görüşlərin keçirilməsinin beynəlxalq təcrübənin öyrənilməsi və kibertəhlükəsizlik sahəsində birgə fəaliyyət imkanlarının genişləndirilməsi baxımından mühüm rolu olduğunu qeyd edib.
Akademik Rasim Əliquliyev İnformasiya Texnologiyaları İnstitutunda 30 ildən çox müddətdə kibertəhlükəsizliyin aktual elmi-praktik problemlərinin araşdırıldığını, bu istiqamətdə yüksəkixtisaslı kadr hazırlığının həyata keçirildiyini vurğulayıb. Alim institutda süni intellekt, “data science”, proqram mühəndisliyi, təbii dilin emalı, kiberfiziki sistemlər, rəqəmsal dövlət, rəqəmsal tibb, kibertəhlükəsizlik, dərin təlim, Əşyaların İnterneti, böyük verilənlərin analitikası istiqamətində aparılan tədqiqatlardan bəhs edib. Həmçinin institutun təşkilatçılığı ilə dövlətin kibersuverenliyinin təmin olunmasına, rəqəmsal kriminalistikanın və proqram mühəndisliyinin aktual elmi-praktiki problemlərinə həsr olunmuş konfransların keçirilməsinin planlaşdırıldığını söyləyib.
AMEA-nın vitse-prezidenti Azərbaycanda ilk Kompüter İnsidentlərinə qarşı Mübarizə Mərkəzi –CERT-in (“AzScienceCERT”) məhz İnformasiya Texnologiyaları İnstitutunda yaradıldığını diqqətə çatdırıb. Alim “AzScienceNet” şəbəkəsinin 2015-ci ildə GEANT Assosiasiyasında milli elm və təhsil şəbəkələrinin operatoru statusunda üzvlüyə qəbul olunmasını “AzScienceCERT”in institusional və texnoloji inkişafına əhəmiyyətli töhfə verdiyini vurğulayıb.
Alim iki qurum arasında əməkdaşlığın milli kibertəhlükəsizlik ekosisteminin möhkəmləndirilməsinə, rəqəmsal infrastrukturun dayanıqlığının təmin olunmasına və ölkədə qabaqcıl kibertəhlükəsizlik təcrübələrinin tətbiqinə əhəmiyyətli töhfə verəcəyinə əminliyini ifadə edib.
Görüş çərçivəsində JPCERT/CC ilə ikitərəfli əlaqələrin qurulması, kibertəhlükəsizlik sahəsində birgə təşəbbüslərin reallaşdırılması, kadr və təcrübə mübadiləsinin aparılması, eləcə də birgə konfransların keçirilməsi məsələləri ətrafında müzakirələr aparılıb.
