Martın 5-də Avstriyanın ölkəmizdəki səfirinin müvəqqəti işlər üzrə vəkili, konsul Michael Hofbauer Azərbaycan Dillər Universitetində (ADU) qonaq olub.
Bu barədə "Tehsil365"ə ADU-dan məlumat verilib. Bildirilib ki,
ADU-nun rektoru, akademik Kamal Abdulla qonağı salamlayaraq onu universitetdə görməkdən məmnun olduğunu bildirib. Rektor ADU-da alman dilinə və Avstriya mədəniyyətinə böyük maraq olduğunu vurğulayıb. Görüş zamanı universitetdə fəaliyyət göstərən Avstriya Mərkəzi və Avstriya kitabxanası haqqında məlumat verilib.
Kamal Abdulla qeyd edib ki, ADU xarici dillərin tədrisi və təbliği istiqamətində fəaliyyət göstərən ali təhsil müəssisəsidir və xarici dillərin öyrənilməsi eyni zamanda müxtəlif mədəniyyətlərin də öyrənilməsini zəruri edir. O bildirib ki, universitet təhsil və beynəlxalq əlaqələrin inkişafı sahəsində əldə etdiyi nəticələrə görə QS beynəlxalq reytinq cədvəlində də uğur qazanıb və 1500 universitet arasında 200-cü yeri tutub.
Rektor həmçinin vurğulayıb ki, 2010-cu ildən universitetdə Avstriya kitabxanası fəaliyyət göstərir. Kitabxanada müxtəlif kitab təqdimatları, müəlliflərlə görüşlər və dəyirmi masalar təşkil olunur. Bildirilib ki, kitabxananın fondunda beş minə yaxın kitab, eləcə də iki yüzdən çox qəzet və jurnal mövcuddur.
Səmimi qarşılanmaya və qonaqpərvərliyə görə təşəkkürünü bildirən Michael Hofbauer beynəlxalq əlaqələrin qurulması və elmi əməkdaşlıq perspektivləri barədə fikirlərini bölüşüb. O qeyd edib ki, Azərbaycan və Avstriya arasında elmi və mədəni sahələrdə sıx əlaqələr mövcuddur.
Görüş zamanı ADU-da Avstriya Mərkəzinin və Avstriya kitabxanasının fəaliyyət göstərməsinin önəmi vurğulanıb. Bildirilib ki, səfirlik universitetlər arasında elmi və mədəni əlaqələrin inkişafı istiqamətində lazımi dəstəyin göstərilməsinə hazırdır.
Görüş gələcək elmi əməkdaşlıq imkanları ətrafında aparılan müzakirələrlə davam edib.