Sumqayıt Dövlət Universitetində (SDU) 8 Mart – Beynəlxalq Qadınlar Günü münasibətilə silsilə tədbirlər çərçivəsində xanım tələbələr arasında “Zərif Zəka” adlı intellektual yarış təşkil olunub.
Bu barədə "Tehsil365"ə Sumqayıt Dövlət Universitetindən məlumat verilib. Bildirilib ki, tədbir martın 5-də universitetin Kitabxana İnformasiya Mərkəzində SDU-nun Tələbə Həmkarlar İttifaqı Komitəsinin (THİK) təşkilatçılığı ilə keçirilib.
Yarışdan əvvəl SDU-nun rektoru vəzifəsini icra edən, AMEA-nın müxbir üzvü Əminağa Sadıqov çıxış edərək xanım tələbələri əlamətdar gün münasibətilə təbrik edib. O qeyd edib ki, Azərbaycan qadını cəmiyyətdə xüsusi mövqeyə malikdir və müxtəlif sahələrdə, o cümlədən dövlət idarəçiliyində məsul vəzifələri ləyaqətlə icra edir.
Əminağa Sadıqov bildirib ki, yaxşı təhsil almaq və universitetdə qazanılan bilik və bacarıqlar insanı ömür boyu müşayiət edir. Onun sözlərinə görə, bu biliklər sayəsində tələbələrin dünyagörüşü genişlənir, intellektual səviyyəsi formalaşır. Rektor v.i.e. qeyd edib ki, məzunların son nailiyyətləri yüksək səviyyədə qiymətləndirilir və bu da universitet üçün qürur mənbəyidir.
Daha sonra THİK-in sədri Elmin Novruzlu çıxış edərək yarışın şərtləri və qaydaları barədə iştirakçılara məlumat verib. O bildirib ki, üç mərhələdən ibarət olan və hər mərhələdə 12 sual təqdim edilən intellektual yarışda 7 komanda iştirak edib.
Gərgin və maraqlı rəqabət şəraitində keçən yarışın nəticələrinə əsasən Tarix və coğrafiya fakültəsinin komandası I, Magistratura komandası II, İqtisadiyyat və idarəetmə fakültəsinin komandası isə III yerə layiq görülüb.
Sonda qalib komandalara kubok, fəxri fərman və hədiyyələr təqdim olunub.
