Azərbaycan Dövlət Pedaqoji Universitetində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İnnovasiyalar Mərkəzi tərəfindən həyata keçirilən “Gələcək üçün bacarıqlar” layihəsinin V “TUSİ” inkubasiya proqramı ilə bağlı infosessiya keçirilib.
Bu barədə “Tehsil365"ə universitetdən məlumat verilib. ADPU-nun elm və innovasiyalar üzrə prorektoru professor Asəf Zamanov tələbələrin innovativ düşüncə tərzinin formalaşdırılmasının və sahibkarlıq bacarıqlarının inkişaf etdirilməsinin müasir ali təhsilin vacib istiqamətlərindən biri olduğunu söyləyib. Prorektor bildirib ki, müasir dövrdə bilik yalnız nəzəri çərçivədə qalmamalı, praktik nəticələrə çevrilməlidir. Startap fəaliyyəti gənclərə öz ideyalarını reallaşdırmaq, mövcud problemlərə innovativ həllər təqdim etmək və gələcəkdə sahibkar kimi formalaşmaq imkanı verir.
Professor qeyd edib ki, “ASAN xidmət”in fəaliyyəti ölkəmizdə innovasiyaların, gənclərin təşəbbüslərinin və sosial layihələrin dəstəklənməsi baxımından mühüm rol oynayır və bu kimi proqramlar tələbələr üçün yeni imkanlar, mentorluq mexanizmləri və startap təşəbbüsləri üçün geniş platforma yaradır.
Daha sonra İnnovasiyalar Mərkəzinin Layihələrin idarə edilməsi departamentindən layihə meneceri Nərmin Kərimova və departament müdirinin müavini Ziniddin Babayev tələbələrə “Gələcək üçün bacarıqlar” layihəsi və V “TUSİ” inkubasiya proqramı barədə ətraflı məlumat veriblər. Çıxışlarda proqramın məqsədləri, iştirak qaydaları, təlim modulları, mentorluq imkanları və startap ideyalarının inkişaf etdirilməsi mexanizmləri barədə təqdimat edilib, tələbələri maraqlandıran suallar cavablandırılıb.
Qeyd edək ki, “Gələcək üçün bacarıqlar” layihəsi çərçivəsində gənclərin innovativ ideyalarının inkişafına dəstək göstərilir, onların startap ekosisteminə inteqrasiyası təşviq olunur və ideyaların real layihələrə çevrilməsi üçün zəruri bilik və bacarıqların əldə edilməsinə şərait yaradılır.
