Azərbaycan Milli Elmlər Akademiyası Arxeologiya və Antropologiya İnstitutunun Antik dövr və Alban Arxeologiyası şöbəsinin müdiri, tarix üzrə fəlsəfə doktoru, dosent Natiq Alışovun AMEA-nın 80 illiyinə həsr olunmuş “Qafqaz Albaniyasında xristianlıq: Tarixi, arxeoloji və memarlıq irsi" adlı monoqrafiyası işıq üzü görüb.
“Tehsil365" xəbər verir ki, kitabın elmi redaktorları AMEA-nın müxbir üzvü, tarix elmləri doktoru, professor İlyas Babayev, AMEA A.A.Bakıxanov adına Tarix və Etnologiya İnstitutunun Atropatena-Albaniya tarixi şöbəsinin müdiri, tarix elmləri doktoru Ramil Ağayev, rəyçiləri Bakı Dövlət Universitetinin Arxeologiya və Etnoqrafiya kafedrasının müdiri, tarix elmləri doktoru, professor Tarix Dostiyev, Bakı Dövlət Universitetinin Azərbaycanın qədim və orta əsrlər tarixi kafedrasının dosenti, tarix üzrə fəlsəfə doktoru Yunis Nəsibovdur.
340 səhifədən ibarət monoqrafiyada Qafqaz Albaniyasında xristianlığa qədərki dini görüş və inanclar, xristianlığın yayılması prosesi, İslam dininin bərqərar olmasından sonra Qafqaz Albaniyasındakı mövcud dini və siyasi durum işıqlandırılıb. Monoqrafiyada Qafqaz Albaniyasında dini görüş və inanclar, xristianlığın yayılması, xristianlıq və İslam, mağara məbədlər, dairəvi məbədlər, sövməələr, yarımqazma kilsələr, xaçvari kilsələr, tədqiq olunmuş kilsələr, qeydə alınmış kilsələr, trapesvari kilsələr, monastrlar, qəbir abidələri, əlifba və epiqrafik abidələr, maddi mədəniyyət nümunələri, mənəvi mədəniyyət nümunələri, Azərbaycan, ingilis və rus dillərində “Chirstianity in Caucasian Albania: History, Archaeology and Architectural Heritage və Христианство в Кавказской Албании: История, Археология и Архитектурное Наследие” mövzusunda əhatəli xülasə təqdim edilib.
Monoqrafiya Qafqaz Albaniyasının xristianlıq dövrü tarixi, arxeologiyası və memarlıq irsi ilə maraqlanan mütəxəssislər, memarlar, bu istiqamətdə təhsil alan tələbələr və magistrlər, eləcə də geniş oxucu kütləsi üçün nəzərdə tutulub.