Uşaqlıq travmaları uşağın dünyanı qəbul etməsinə, özünəinamına və gələcək münasibətlərinə dərin təsir göstərə bilər; emosional laqeydlik, ailədaxili gərginlik və valideyn itkisi kimi təcrübələr sonrakı həyatda emosional çətinliklərə, etibar problemlərinə və psixoloji pozuntulara gətirib çıxara bilər.
Mirsadiq Muxtarov “Tehsil365” saytına verdiyi açıqlamada bildirib ki, uşaqlıq travmaları yalnız fiziki zorakılıqla məhdudlaşmır:
“Uşaqlıq travmaları və onların insan həyatına təsiri olduqca geniş mövzudur. Uşaqlıq dövrü insan şəxsiyyətinin formalaşdığı ən həssas və vacib mərhələlərdən biridir. Bu dövrdə yaşanan hadisələr uşağın dünyanı necə qəbul etməsinə, özünə və ətrafdakı insanlara münasibətinə birbaşa təsir göstərir. Travma dedikdə yalnız fiziki zorakılıq deyil, eyni zamanda emosional laqeydlik, uşağa qarşı davamlı tənqidlər, ailədaxili gərginlik, valideynlər arasında konfliktlər, valideyn itkisi və sevgi çatışmazlığı kimi hallar da nəzərdə tutulur.”
Psixoloqun sözlərinə görə, bu kimi təcrübələr insanın gələcək psixoloji vəziyyətinə və münasibətlərinə təsir göstərə bilər:
“Belə şəxslərdə özünəinamın və özünüqiymətləndirmənin aşağı olması, insanlara güvənməkdə çətinlik və sosial münasibətlərdə problemlər müşahidə oluna bilər. Bəzi hallarda uşaqlıqda kifayət qədər sevgi və dəstək görməyən insanlar yetkinlik dövründə münasibətlərdə həddindən artıq ehtiyatlı davranır və ya daim təsdiq və diqqət axtarmağa meylli olurlar.”
Mütəxəssis qeyd edib ki, uzunmüddətli psixoloji gərginlik bəzi hallarda depressiya, təşviş pozuntuları və stressə qarşı dözümsüzlük kimi problemlərə səbəb ola bilər.
Bununla yanaşı, o vurğulayıb ki, uşaqlıq travmaları insanın gələcəyini mütləq şəkildə müəyyən etmir:
“İnsan psixikası adaptasiya xüsusiyyətinə malikdir. Vaxtında göstərilən psixoloji dəstək, sağlam sosial mühit və anlayışlı münasibətlər travmanın təsirini azaltmağa kömək edə bilər. Müasir psixologiyada tətbiq olunan psixoterapiya üsulları vasitəsilə insanlar yaşadıqları çətinliklərin öhdəsindən gələ və həyat keyfiyyətlərini yaxşılaşdıra bilərlər.”
Ekspert həmçinin bildirib ki, uşaqların emosional ehtiyaclarını anlamaq, onları dinləmək və təhlükəsiz mühit yaratmaq psixoloji sağlam fərdlərin formalaşmasında mühüm rol oynayır.