Bu gün görkəmli Azərbaycan rəssamı, ictimai xadim Salam Salamzadə-nin doğum günüdür.
“Tehsli365” xəbər verir ki, Salam Əbdülqasım oğlu Salamzadə 1908-ci il 23 fevralda (7 mart) Bakıda anadan olub. O, Azərbaycan təsviri sənətinin inkişafında mühüm rol oynamış sənətkar kimi tanınır. Yaradıcılığı boyu müxtəlif mövzulu əsərlər yaradan rəssam milli rəngkarlıq məktəbinin formalaşmasına öz töhfəsini verib.
Sənətkarın əsərlərindən ibarət fərdi sərgiləri Bakıda (1959, 1962, 1974), Moskvada (1969, 1974) və Kiyevdə (1974) təşkil olunub. Onun əsərləri təkcə Azərbaycanda deyil, həm də bir sıra xarici ölkələrin muzeylərində, qalereyalarında və şəxsi kolleksiyalarında saxlanılır.
Salam Salamzadə yaradıcılıq fəaliyyəti ilə yanaşı ictimai fəaliyyətlə də məşğul olub. O, Azərbaycan Milli İncəsənət Muzeyi və Nizami Gəncəvi adına Azərbaycan Ədəbiyyatı Muzeyi-nin direktoru vəzifələrində çalışıb.
Hazırda rəssamın 72 əsəri Azərbaycan Dövlət Rəsm Qalereyası-nın fondunda qorunub saxlanılır.
Qeyd edək ki, Azərbaycan SSR əməkdar incəsənət xadimi fəxri adına 1940-cı ildə, Azərbaycan SSR xalq rəssamı adına isə 1982-ci ildə layiq görülmüş Salam Salamzadə 1997-ci il 12 may tarixində Bakıda vəfat edib.