Azərbaycan Dillər Universitetinin (ADU) Beynəlxalq Münasibətlər və Regionşünaslıq fakültəsinin nəzdində fəaliyyət göstərən Qərb ölkələri üzrə Regionşünaslıq kafedrasının təşkilatçılığı ilə 4 mart tarixində “Dayanıqlı İnkişaf Məqsədləri və Gender” çərçivəsində “Azərbaycanda memar qadınlar” mövzusunda dəyirmi masa keçirilib. Tədbir həmçinin 2026-cı ilin ölkədə “Şəhərsalma və Memarlıq ili” elan edilməsi ilə əlaqədar təşkil olunub və Azərbaycan memarlığında qadınların rolunun, onların peşəkar fəaliyyətinin, eləcə də şəhər mühitinin formalaşmasına verdikləri töhfələrin müzakirəsinə həsr edilib.
Bu barədə “Tehsil365”ə ADU-dan məlumat verilib. Bildirilib ki, dəyirmi masa Qərb ölkələri üzrə Regionşünaslıq kafedrasının müdiri, professor Sevdagül Əliyevanın giriş nitqi ilə açılıb. O, müasir urbanizasiya prosesləri fonunda memarlıq və şəhərsalmanın cəmiyyətin sosial-mədəni inkişafında mühüm rol oynadığını vurğulayıb, xüsusilə memarlıq sahəsində fəaliyyət göstərən qadın mütəxəssislərin bu proseslərdə artan iştirakının əhəmiyyətindən danışıb. Əliyeva qeyd edib ki, memarlıq yalnız texniki və estetik fəaliyyət sahəsi deyil, həm də sosial mühitin və ictimai münasibətlərin formalaşmasına təsir göstərən mühüm yaradıcı sahələrdən biridir.
Tədbirdə Azərbaycan Memarlıq və İnşaat Universitetinin (AzMİU) “Mühit dizaynı” kafedrasının müdiri, professor, əməkdar memar Hacıyeva Yeganə Ərşad qızı “Şəhər mühitində qadın” mövzusunda məruzə ilə çıxış edib. O, müasir şəhər mühitinin formalaşdırılmasında gender aspektlərinin rolunu, şəhər məkanlarının planlaşdırılması və dizaynında qadın baxışının əhəmiyyətini elmi və praktik nümunələr əsasında izah edib. Məruzədə qadın memarların şəhər mühitini daha humanist, funksional və estetik baxımdan zənginləşdirmədəki rolu xüsusi vurğulanıb.
Daha sonra AzMİU-nun “Mühit dizaynı” kafedrasının dosenti, Bakı Memarlar Assosiasiyasının professoru Ağayeva Nərgiz Əli qızı “Güzəşt sevməz bir ilahi sənət” mövzusunda məruzə ilə çıxış edib. Natiq memarlığın yüksək məsuliyyət və peşəkar yanaşma tələb edən yaradıcı sahə olduğunu, həm estetik, həm funksional, həm də sosial aspektlərinin harmoniyasının vacibliyini diqqətə çatdırıb. O, memarlığın cəmiyyətin mədəni kimliyinin formalaşmasında və tarixi irsin qorunmasında oynadığı rolu xüsusi vurğulayıb.
Tədbir çərçivəsində AzMİU-nun “Mühit dizaynı” kafedrasının baş müəllimi Qədirli Cəmalə Orxan qızı “Mənim sənət yolum” adlı məruzə ilə çıxış edib. Çıxışda müəllif şəxsi yaradıcılıq təcrübəsi, memarlıq və dizayn sahəsində qazandığı peşəkar nailiyyətlər və gənc memarların formalaşması prosesində qarşılaşdıqları çətinliklər və imkanlar barədə ətraflı məlumat verib.
Dəyirmi masa iştirakçıların fəal müzakirələri ilə davam edib. Tədbirdə memarlıq sahəsində qadınların elmi və yaradıcı fəaliyyətinin inkişaf perspektivləri, memarlıq təhsilinin təkmilləşdirilməsi məsələləri ətrafında fikir mübadiləsi aparılıb. Tədbir memarlıq və şəhərsalma sahəsində gender balansının və qadın mütəxəssislərin rolunun daha geniş şəkildə tanıdılması baxımından mühüm əhəmiyyət kəsb edir.
