5 mart 2026-cı il tarixində Azərbaycan Dillər Universitetinin (ADU) akt zalında böyük alim və pedaqoq, professor İsmixan Rəhimovun anadan olmasının 100 illiyinə həsr olunmuş tədbir təşkil edilib. Tədbir Azərbaycan Dillər Universitetinin Tərcümə fakültəsinin German dillərinin tərcümə nəzəriyyəsi və praktikası kafedrası, İngilis-Fransız dilləri kafedrası, İngilis dilinin qrammatikası kafedrası və Tələbə Elmi Cəmiyyətinin birgə təşəbbüsü ilə baş tutub.
Bu barədə “Tehsil365”ə ADU-dan məlumat verilib. Bildirilib ki, tədbirin məqsədi görkəmli elm xadiminin elmi-pedaqoji fəaliyyətini, Azərbaycan elmi və təhsilinə verdiyi töhfələri bir daha xatırlamaq və onun zəngin irsini gənc nəslə çatdırmaq olub.
Tədbiri giriş sözü ilə universitetin rektoru, akademik Kamal Abdullayev açaraq İsmixan Rəhimovun Azərbaycan elmi və maarifçilik tarixində tutduğu mühüm mövqedən danışıb. O, alimin yalnız elmi fəaliyyəti ilə deyil, həm də yetişdirdiyi tələbələr və davamçıları ilə milli elmin inkişafında xüsusi rol oynadığını vurğulayıb.
Rəsmi hissədən sonra İsmixan Rəhimovun həyat və fəaliyyətinə həsr olunmuş “İldırımlı yolun yolçuları” adlı sənədli filmdən 12 dəqiqəlik fraqment nümayiş etdirilib. Filmin ssenari müəllifi və rejissoru, əməkdar mədəniyyət işçisi Müsəllim Həsənovdur. Film alimin həyat yolunu, elmi yaradıcılığını və onun haqqında xatirələri əks etdirən maraqlı materiallarla yadda qalıb.
Tədbirdə tanınmış alim və müəllimlər çıxış edərək İsmixan Rəhimovun elmi irsi haqqında fikirlərini bölüşüblər. Professor Qılıncxan Bayramov alimin pedaqoji fəaliyyətindən və tələbələri ilə qurduğu səmimi münasibətlərdən danışıb. Dosent Fiala Abdullayeva və baş müəllim Yusif Savalan çıxışlarında alimin elmi yaradıcılığının və tədqiqat istiqamətlərinin müasir dövrdə də aktuallığını vurğulayıblar. Professor Şəhla Nağıyeva isə İsmixan Rəhimovun elmi məktəbinin formalaşmasında oynadığı rolu geniş şəkildə təqdim edib.
Sənədli filmin ssenari müəllifi və rejissoru Müsəllim Həsənov da çıxış edərək filmin hazırlanma prosesi və istifadə olunan arxiv materialları barədə məlumat verib.
Proqram çərçivəsində tələbələrin və gənc tədqiqatçıların çıxışları da dinlənilib. Fatimə Məmmədova alimin doğum və ilk illəri, Leyla Nəzərli onun pioner dövrü və formalaşma mərhələsi, Fəzilə Saniyeva İsmixan Rəhimovun yaradıcılığı, Aysun Lətifova isə alimin aldığı təltif və mükafatlar haqqında məlumat veriblər.
Tədbirin bədii hissəsində Elyanora Babayeva şeir səsləndirib, tələbələr Aytac Qaziyeva və Zərifə Rəhimova isə alimin həyat və fəaliyyətinə dair təqdimatlar ediblər.
Sonda vurğulanıb ki, İsmixan Rəhimovun zəngin elmi irsi Azərbaycan elminin inkişafında mühüm rol oynamaqda davam edir və onun fəaliyyəti gələcək nəsillər üçün dəyərli nümunə olaraq qalır. Tədbir alimin xatirəsinin ehtiramla yad edilməsi və elmi irsinin təbliği baxımından xüsusi əhəmiyyət kəsb edib.
