Martın 5-də Azərbaycan Dillər Universitetində (ADU) İngilis və Fransız dilləri fakültəsi nəzdində fəaliyyət göstərən İngilis dilinin tədrisi metodikası kafedrasının fəlsəfə doktoru proqramı üzrə doktorantı Rövşən İsmayılov tərəfindən “Tələbələrin natiqlik bacarıqlarının formalaşdırılması: Azərbaycanın təcrübəsi (The Formation of Students’ Formal and Public Speaking Skills: The Experience of Azerbaijan)” mövzusunda seminar təşkil edilib.
Bu barədə “Tehsil365”ə ADU-dan məlumat verilib. Bildirilib ki, seminarda metodikayönümlü ixtisaslarda təhsil alan bakalavr və magistr tələbələri, doktorantlar, eləcə də ADU-nun pedaqoji heyəti iştirak edib.
Seminarın əsas məqsədi tələbələrin natiqlik bacarıqlarının əhəmiyyətini izah etmək, “tələbə səsi” (student voice) və “tələbə təşəbbüskarlığı” (student agency) anlayışlarının natiqliklə əlaqəsini göstərmək, həmçinin tələbələrin bu sahədə inkişafına təsir edən amilləri müəyyənləşdirmək olub. Tədbirdə xüsusilə tələbələrin özünə inamının, dil və ünsiyyət bacarıqlarının, eləcə də təlim prosesində fəal iştirakının inkişafında natiqliyin rolu vurğulanıb.
Seminarda qeyd olunub ki, natiqlik bacarıqları yalnız kommunikativ bacarıq deyil, eyni zamanda tələbələrin fikirlərini ifadə etməsi, özünə inam qazanması və təhsil prosesində daha fəal iştirak etməsi üçün mühüm vasitədir. Müasir təhsil sistemində isə XXI əsr bacarıqları – tənqidi təfəkkür, yaradıcılıq, qrup işi, rəqəmsal savadlılıq, liderlik və digər bacarıqlar – tələbələrin akademik və peşəkar həyatında uğur qazanması baxımından xüsusi əhəmiyyət daşıyır. Xarici tədqiqatlar göstərir ki, natiqlik bu bacarıqlar sırasında mühüm yer tutur və bir çox universitetlərdə rəsmi şəkildə tədris olunur.
Seminarda tələbələrin ictimai nitq bacarıqlarının inkişafına təsir edən maneələr (barriers) və təşviqedici amillər (enablers) də müzakirə olunub. Natiqliyin inkişaf etdirilməsi məqsədilə bir sıra praktik tövsiyələr irəli sürülüb. Bunlara xarici dil dərslərində natiqlik və çıxış mövzularının inteqrasiyası, ümumtəhsil və ali təhsil müəssisələrində innovativ layihələrin, debat klublarının, müsabiqələrin və forumların təşkili, tələbələrin bu fəaliyyətlərdə fəal iştirakının təşviqi, eləcə də müəllimlər üçün davamlı peşəkar inkişaf proqramlarının təşkil edilməsi daxildir.
Seminarın sonunda iştirakçılar faydalı məlumat və praktik tövsiyələrə görə doktoranta təşəkkürlərini bildiriblər. Tədbir çərçivəsində iştirakçılar mövzu ilə bağlı suallar səsləndirib, fikir mübadiləsi aparıblar və doktorant sualları cavablandırıb.
